Тошкентдаги экологик хавфли 87 та корхона шаҳар ташқарисига кўчирилади

Тошкент шаҳри ҳудудида жойлашган экологик жиҳатдан хавфли 87 та саноат корхонаси босқичма-босқич шаҳар ташқарисига кўчирилади. Бу ҳақда Экология ва иқлим ўзгариши миллий қўмитаси маълум қилди.

Ушбу чора-тадбирлар Президентнинг 2025 йил 30 январда қабул қилинган “Ўзбекистон — 2030” стратегиясини “Атроф-муҳитни асраш ва яшил иқтисодиёт йили”да амалга оширишга оид давлат дастурига мувофиқ амалга оширилмоқда.

Ҳужжатга кўра, экологик хавфи юқори ва энергия сарфи катта бўлган ишлаб чиқариш қувватларини модернизация қилиш ҳамда уларни шаҳарлардан ташқарига кўчириш режалаштирилган. 

Маълум қилинишича, Тошкент шаҳрида ушбу талабларга жавоб берадиган 87 та корхона аниқланган. Уларни кўчириш мавжуд ишлаб чиқариш қувватларини янгилаш ва технологик жараёнларни замонавий экологик стандартларга мослаштириш шарти билан амалга оширилади.

Белгиланган вазифалар ижросини таъминлаш мақсадида махсус комиссия томонидан саноат объектларида доимий текширувлар ўтказилмоқда. Хусусан, экологик хавфли I тоифага кирувчи “Ўзвторцветмет” АЖ фаолияти тўхтатилиб, корхона Жиззах вилоятидаги саноат ҳудудига кўчирилиши белгиланди.

2025 йил октябрь ойида ўтказилган текширувлар давомида мазкур корхона томонидан атроф-муҳитни ифлослантириш ҳолатлари аниқланган. Натижада корхонага мажбурий кўрсатма берилган ва етказилган экологик зарар учун 18 миллиард 91 миллион 717 минг 137 сўм миқдорида компенсация ҳисобланган.

Маълум қилинишича, ушбу маблағлар ҳисобидан эски ва экологик жиҳатдан зарарли эритиш печлари утилизация қилинади ҳамда ишлаб чиқариш замонавий, экологик талабларга жавоб берадиган ускуналарда давом эттирилади.

Кўрилган чоралар натижасида атмосферага чиқариладиган зарарли моддалар ҳажми йилигa ўртача 226,7 тоннага камайиши кутилмоқда. Бу эса Тошкент шаҳрининг Янгихаёт туманида ҳаво сифати сезиларли даражада яхшиланишига хизмат қилади.