Tramp: “Isroilning Qatarga hujum qilish qarori toʻliq Netanyahuga tegishli”

Tramp Truth Social platformasida: “suveren davlat va AQShning yaqin ittifoqchisi boʻlgan Qatarni bombardimon qilish na Isroilga, na Amerikaning maqsadlariga xizmat qiladi” deb yozdi.

Prezidentning soʻzlariga koʻra, ular hujum haqida faqatgina uning amalga oshishi oldidan AQSh armiyasi orqali maʼlumot olgan. “Biz bu haqda xabardor boʻlgan paytimizda kech boʻlgan edi”, — dedi u. Shu zahoti u oʻzining maxsus vakili Stiv Uitkoffga Qatar tomonini yaqinlashayotgan hujumdan xabardor qilishni topshirgan, biroq bu hujumni toʻxtatish imkoniyati boʻlmagan.

Tramp Qatarni AQShning kuchli ittifoqchisi va doʻsti sifatida eʼtirof etar ekan, hujumdan keyin Isroil bosh vaziri Netanyahu hamda Qatar amiri va bosh vaziri bilan muloqot oʻtkazganini qayd etdi. Uning taʼkidlashicha, Vashington Qatar hududida bunday voqea qayta sodir boʻlmasligiga kafolat beradi.

Shuningdek, Tramp davlat kotibi Marko Rubioga Qatar bilan mudofaa sohasida hamkorlik toʻgʻrisidagi kelishuvni yakunlash vazifasini topshirganini bildirdi.