Zamonaviy urushning xavfli quroli: Navigatsiya buzildi, yuzlab kemalar ortda qoldi

Bu ortiqcha taʼsir natijasida yuzlab kemalarning navigatsiya tizimlari ishdan chiqdi.

Maʼlumotlarga koʻra, 28 fevralda BAA, Qatar, Umon va Eron suvlarida 1100dan ortiq savdo kemasining navigatsiyasi elektron aralashuvlar tufayli buzilgan. Bu holat Hurmuz boʻgʻozidagi dengiz harakatini sezilarli ravishda sekinlatdi va xavfli vaziyat yaratdi.

Windward kompaniyasi tahlilchisi Mishel Vize Bokmanning aytishicha, kemalar navigatsiyasining buzilishi «juda xavfli» boʻlib, zamonaviy urushlardagi eng murakkab tahdidlardan biri hisoblanadi.

Shuningdek, dastlabki 24 soatda mintaqada 21 ta yangi GPS buzilish nuqtasi aniqlandi, keyin esa bu raqam 38 taga yetdi. 3 martga qadar 655 kemani qamrab olgan 1735 ta GPS aralashuvi qayd qilindi. Hodisalar odatda 3–4 soat davom etgan.

Zamonaviy GPS tizimlari, shu jumladan AQShning GPS, Yevropa Galileo, Xitoy BeiDou va Rossiya GLONASS signallari koʻpincha ochiq boʻlgani uchun elektron signallar bilan osonlikcha buzilishi mumkin. Bu zamonaviy kemalar va samolyotlarning navigatsiyasini elektron hujumlarga nisbatan zaif qiladi.