Isroil Livanda “Hizbulloh”ga qarshi quruqlikdan operatsiyalar boshladi

Isroil harbiylarining taʼkidlashicha, mudofaa tizimini mustahkamlash maqsadida qoʻshinlar Livan chegarasining bir necha nuqtalariga joylashtirilgan. Bu kuchlar Isroilning 2024 yil noyabrdagi oʻt ochishni toʻxtatish kelishuvidan beri Livan janubida saqlab turgan beshta pozitsiyasiga qoʻshimcha sifatida kiritilgan.

Livanlik guruh AQSh va Isroilning Eronga qarshi operatsiyalari davomida oliy rahnamo Oyatulloh Ali Xomanaiyning oʻldirilishiga “qasos” sifatida yahudiy davlatga qarshi hujumga oʻtgan. Bunga javoban Isroil ham Livanga zarbalar bermoqda.

Shunga qaramay, SAHAL Eron bilan bogʻliq vaziyat barqarorlashguncha (yoki umuman) Livanga keng koʻlamli bosqin boshlanishi ehtimoli pastligini bildirmoqda.

“Hizbulloh”ning zaiflashishi: Eron omili va ichki inqiroz

Isroil razvedkasiga koʻra, “Hizbulloh” Eronning tayyorgarligi va yoʻl-yoʻriqlarisiz parchalanib ketish xavfi ostida. Hozirda Eron rejimi oʻzi omon qolish uchun kurashayotgani sababli guruhga yordam sezilarli darajada kamaygan. Urush boshlanganidan beri guruhning deyarli yagona daromad manbai boʻlgan Eron mablagʻlaridan mahrum boʻlish “Hizbulloh”ga halokatli zarba beradi.

Shuningdek, guruh 2023–2024-yillardagi mojarolar paytida koʻrilgan zararlar uchun tovon puli olmagan oʻz tarafdorlarining ham gʻazabi bilan duch kelmoqda. SAHAL ushbu omillar Livan milliy armiyasi tomonidan “Hizbulloh”ni qurolsizlantirishga olib kelishi mumkinligini taxmin qilmoqda.

Raketa hujumlari va Radvan boʻlinmasi

“Hizbulloh”ning Isroilga hujumlariga toʻxtalar ekan, harbiylar aksariyat raketalar dengizga yoki ochiq maydonlarga tushganini, faqat bitta raketa urib tushirilganini qayd etdi.

Isroil tomoni Livan armiyasining “Hizbulloh”ni janubga, Isroil chegarasi tomon harakatlanishdan toʻxtatishga urinishlarini eʼtirof etdi. Maʼlum qilinishiga koʻra, guruhning 2 000 kishilik Radvan maxsus boʻlinmasining asosiy qismi xavfsizlik nuqtai nazaridan Beyrutda qolgan, janubga faqat kichik bir qismi yetib kelgan.

Isroil mudofaa vaziri Israyel Katsga koʻra, Livanga qarshi uyushtirilayotgan hujumlarda nishon guruhning yangi rahbari Shayx Naim Qosim ekanini ochiqladi.

“Livan hukumati va armiyasi "Hizbulloh"ni qurolsizlantirish boʻyicha koʻp marta ogohlantirilgan edi. Ular harakat qilmadi, endi esa biz oʻzimizni qanday himoya qilishni bilamiz. Ushbu kampaniya nafaqat Eronning, balki ‘Hizbulloh’ning ham butunlay tor-mor etilishi bilan yakunlanadi”, dedi SAHAL Bosh shtabi boshligʻi, general-leytenant Eyal Zamir.