Uchta hududda noqonuniy koʻmir sotgan MChJ xodimlari ushlandi

Qayd etilishicha, Namangan viloyatida joylashgan "Koʻmir taʼminot" MChJ omborining masʼul shaxslari kuz-qish mavsumida imtiyozli narxlarda aholiga yetkazib berish uchun ajratilgan umumiy bahosi 4,1 mlrd soʻmlik jami 13,3 ming tonna koʻmirni boshqa shaxslarga sotib yuborgan. 

Shu kabi Xorazm viloyatidagi “Koʻmir taʼminot” MChJning Bogʻot tumani koʻmir ombori kassiri S.K. haydovchisi E.O. va ombor qorovuli K.M. umumiy bahosi 85,5 mln soʻmlik 276 tonna boʻlgan koʻmirni ombordan yashirincha olib chiqib, shundan 900 kg. koʻmirni fuqaro M.X.ga 1 mln soʻmga sotgan vaqtida ashyoviy dalillar bilan ushlangan. 

Bundan tashqari, Qoraqalpogʻiston Respublikasida “I.T.S.” MChJ masʼul shaxslari Taxtakoʻpir va Shumanay tumanlaridagi ijtimoiy soha obʼektlarini issiqlik quvvati bilan uzluksiz taʼminlash maqsadida koʻmir xarid qilish uchun byudjetdan ajratilgan 1,4 mlrd soʻm mablagʻlarning 340,8 mln soʻmini oʻzlashtirish yoʻli bilan talon-toroj qilganliklari aniqlangan. 

Hozirda yuqoridagi holatlar yuzasidan Jinoyat kodeksining tegishli moddalari bilan jinoyat ishlari qoʻzgʻatilib, tergov harakatlari oʻtkazilmoqda.