Учта ҳудудда ноқонуний кўмир сотгaн МЧЖ ходимлари ушланди

Қайд этилишича, Наманган вилоятида жойлашган "Кўмир таъминот" МЧЖ омборининг масъул шахслари куз-қиш мавсумида имтиёзли нархларда аҳолига етказиб бериш учун ажратилган умумий баҳоси 4,1 млрд сўмлик жами 13,3 минг тонна кўмирни бошқа шахсларга сотиб юборган. 

Шу каби Хоразм вилоятидаги “Кўмир таъминот” МЧЖнинг Боғот тумани кўмир омбори кассири С.К. ҳайдовчиси Э.О. ва омбор қоровули К.М. умумий баҳоси 85,5 млн сўмлик 276 тонна бўлган кўмирни омбордан яширинча олиб чиқиб, шундан 900 кг. кўмирни фуқаро М.Х.га 1 млн сўмга сотган вақтида ашёвий далиллар билан ушланган. 

Бундан ташқари, Қорақалпоғистон Республикасида “И.Т.С.” МЧЖ масъул шахслари Тахтакўпир ва Шуманай туманларидаги ижтимоий соҳа объектларини иссиқлик қуввати билан узлуксиз таъминлаш мақсадида кўмир харид қилиш учун бюджетдан ажратилган 1,4 млрд сўм маблағларнинг 340,8 млн сўмини ўзлаштириш йўли билан талон-торож қилганликлари аниқланган. 

Ҳозирда юқоридаги ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.