Ukraina kelajakda Rossiyaning bir qismi boʻlishi mumkin — Donald Tramp

Joriy yilning 10 fevral kuni AQSh Prezidenti Donald Tramp Fox News telekanaliga bergan intervyusida Amerika maʼmuriyatining urushni tugatish boʻyicha qilayotgan saʼy-harakatlari haqida gapirib oʻtgan. Bu intervyu uning Vitse-prezidenti JD Vance va Ukraina Prezidenti Volodimir Zelenskiy oʻrtasida rejalashtirilgan uchrashuv arafasida efirga uzatilgan.

"Ukraina Rossiya bilan kelishuvga erishishi mumkin, balki erisha olmas. Ukraina kelajakda Rossiyaning bir qismiga aylanishi yoki boʻlmasligi ham mumkin", deya Tramp shu jarayonda kinoyali fikr bildirgan.  

Shuningdek, u AQShning Ukrainaga berayotgan yordamidan foyda koʻrishni istayotganini taʼkidlab, yana bir bor Ukrainaning qimmatbaho yer metallarini savdoga qoʻyish taklifini ilgari surgan.

"Ular juda boy yer resurslari — nodir metallar, neft, gazga ega. Men mablagʻimiz kafolatlangan boʻlishini istayman. Men ularga 500 milliard AQSh dollarlik nodir metallar ekvivalentini olishimiz kerak ekanligini aytdim. Ular deyarli bunga rozi boʻldi. Aks holda, biz ahmoqlik qilgan boʻlamiz. Ularga shuni ham aytdimki, biz bu pullarni shunchaki bera olmaymiz, buning evaziga nimadir olishimiz kerak", deya qoʻshimcha qilgan u.

Tabiiyki, Trampning ushbu bayonotlari 2022 yildan buyon Ukrainaning toʻrtta hududni noqonuniy ravishda anneksiya qilib, butun mamlakatni oʻziga boʻysundirmoqchi boʻlgan Rossiyaga yoqib tushdi. Trampning chiqishidan bir kun oʻtib, yaʼni 11 fevral kuni Rossiya Prezidenti matbuot kotibi Dmitriy Peskov Amerika prezidentining soʻzlariga munosabat bildirdi.

"Ukrainaning katta qismi Rossiyaniki va bu allaqachon amalga oshgan haqiqat", deydi u.

Rossiya 2022 yil fevral oyida keng koʻlamli bosqinni boshlaganida, Kiyevni bir necha kun ichida, butun mamlakatni esa bir necha hafta ichida egallab olishni rejalashtirgan edi. Biroq, urush toʻrtinchi yilga oʻtarkan, Moskva Ukraina hududining atigi beshdan bir qismida nazoratni oʻrnata oldi. 

2023 yilda Rossiya bosib olingan Donetsk, Lugansk, Zaporijjya va Xerson viloyatlarida soxta referendum oʻtkazib, ularni rasman anneksiya qilishga uringan edi. Peskovning aytishicha, bu referendumda xalq katta xavf-xatarlarga qaramay, navbatga turib ovoz bergan. 

Bundan tashqari, Tramp Fox News telekanalida bergan intervyusida oʻz maʼmuriyati Rossiya va Ukraina oʻrtasida tinchlik muzokaralariga zamin yaratishda "ulkan yutuqlarga" erishganini taʼkidlagan. Zelenskiy esa Tramp maʼmuriyatidan muhim shaxslar shu hafta ichida Ukrainaga tashrif buyurishini va ularni Myunxendagi Xavfsizlik konferensiyasida kutib olishini maʼlum qilgan.