"Ulugʻbek Ziji" asari ilk bor toʻrt tilda nashr etildi

Oʻzbekiston Fanlar akademiyasi Abu Rayhon Beruniy nomidagi Sharqshunoslik instituti olimlari tomonidan "Ulugʻbek Ziji" ("Ziji jadidi Koʻragoniy") asari ilk bor oʻzbek, rus, ingliz va xitoy tillarida nashr etildi, deb xabar qilmoqda "Dunyo" AA muxbiri.

Oʻzbekiston Fanlar akademiyasi matbuot xizmati yozganidek, ushbu tarixiy kitob XV asrning buyuk astronom olimning asari boʻlib, Amir Temurning nabirasi, Movarounnahr sultoni Mirzo Ulugʻbek (1394-1449) boshchiligidagi bir guruh olimlar tomonidan yaratilgan.

Asar toʻrt qismdan iborat boʻlib, birinchisida xronologiya va taqvimlar, turli xalqlarning yil hisobi, ikkinchi qismda sferik astronomiya va matematik geografiya masalalari hamda matematik va geografik jadvallar berilgan. Uchinchi qism sayyoralar harakati va yulduz astronomiyasiga bagʻishlangan boʻlib, unda 1014 ta yulduzning katalogi keltirilgan. Toʻrtinchi qism astrologiya, yaʼni munajjimlar bashorati tavsifiga oid.