Andijon, Toshkent va Surxondaryoda xavfli dorilarni sotayotganlar qoʻlga olindi

Bosh prokuratura huzuridagi Departamentning Buloqboshi tumani boʻlimi hamda IIB xodimlari hamkorligida tezkor tadbir oʻtkazilgan. Unda qonunga xilof ravishda dori vositalari savdosi bilan shugʻullanib kelgan A.A. (muqaddam sudlangan) “Damas” rusumli avtomashinasida inson ruhiyatiga kuchli taʼsir qiluvchi 124 dona kapsuladagi “Regapen” nomli dori vositasini Andijon shahrida oʻtkazish maqsadida olib kelganligi aniqlanib, ushbu dori vositalari ashyoviy dalil sifatida olingan.

Departamentning Yangihayot tumani boʻlimi tomonidan oʻtkazilgan tezkor tadbirda Yakkasaroy tumani, “Qushbegi” mavzesidagi “N.A.” MChJ dorixona farmatsevti U.T. 50 dona “Omnadren 250” nomli kuchli taʼsir qiluvchi dori vositasini 3 mln soʻmga shifokor retseptisiz sotgan vaqtida ashyoviy dalillar bilan ushlangan.

Shuningdek, Departamentning Surxondaryo viloyati boshqarmasi va IIB xodimlari hamkorligida tezkor tadbir oʻtkazilgan. Unda fuqaro M.A. tarkibida kuchli taʼsir qiluvchi moddalari mavjud 200 kapsula “Benzonal” nomli dori vositasini 1,2 mln soʻmga sotgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qoʻzgʻatilib, tergov harakatlari oʻtkazilmoqda.