Rossiya neft ishlab chiqarish hajmi yanvardan beri 940 ming barrelga kamayib ketdi

Xalqaro energetika agentligi (IEA) Rossiyaning 2026-yil uchun neft qazib olish prognozini yana 125 ming barrelga qisqartirib, kuniga 8,7 mln barrelga tushirdi. Agentlikning yangi tahlili Rossiya energetika infratuzilmasiga, ayniqsa neftni qayta ishlash obyektlariga berilayotgan Ukraina dron hujumlari kuchayib borayotgan bir paytga to‘g‘ri kelmoqda.

Rossiyaning xom neft ishlab chiqarishi avgust oyida kuniga 8,36 mln barrelni tashkil qilgan. Bu iyul oyidagi ko‘rsatkichdan 200 ming barrelga, yanvar oyidagidan esa 940 ming barrelga kam. Avgustdagi ko‘rsatkich 2025-yilning shu oyiga nisbatan ham 695 ming barrelga past bo‘lgan.

Bosim kuchaymoqda

Ukraina Rossiyaning neftni qayta ishlash zavodlari, yoqilg‘i terminallari va boshqa energetika obyektlariga muntazam ravishda dron hujumlarini amalga oshirmoqda. Bunday zarbalar nafaqat alohida zavodlarning faoliyatini vaqtincha to‘xtatishi, balki mamlakatdagi umumiy qayta ishlash quvvatlarini ham qisqartirishi shubhasiz.

IEA ma’lumotlariga ko‘ra, Rossiyada neft mahsulotlarini ishlab chiqarish va eksport qilish ham og‘ir bosimga duch kelmoqda. Rossiyaning ayrim hududlarida avvalroq kuzatilgan benzin tanqisligini hisobga olsak, neftni qayta ishlashdagi uzilishlar ichki yoqilg‘i bozoriga katta ta’sir o‘tkazadi.

Rossiya uchun muammo faqat ishlab chiqarish hajmining kamayishida emas. Neft – mamlakat budjeti va eksport daromadlarining yirik manbalaridan biri. Shu sababli qazib olish va qayta ishlashdagi uzoq uzilishlar davlat daromadlarini keskin tushiradi.

“Reuters” agentligi qo‘lga kiritgan hukumat prognozi loyihasiga ko‘ra, Rossiya Ukraina bilan ziddiyat sababli bu yilgi neft qazib olish ko‘rsatkichini so‘nggi 17 yildagi eng past darajaga tushirgan. Shuningdek, 2026–2027-yillar uchun yoqilg‘i eksporti rejasini qayta ko‘rib chiqqan. Bu shundan darak beradiki, Ukraina zarbalarining Rossiya energetika sektoriga ta’siri tobora kengaymoqda.