Yangi Toshkentdan Oʻzbekiston mehmonxonasiga qatnovchi yangi avtobus yoʻnalishi ishga tushirildi

12 oktabrdan Yangi Toshkentni markaz bilan bogʻlovchi 197-sonli avtobus yoʻnalishi ishga tushirildi. Bu haqda Transport vazirligi matbuot xizmati xabar bermoqda.

Yangi yoʻnalish «Oʻzbekiston mehmonxonasi» bekatidan «Yangi Toshkent» bekatigacha harakatlanadi.

Yoʻnalishda 8 ta 9,5 metrli, oʻrta sigʻimli zamonaviy oq rangli Yutong avtobuslari yoʻlovchilarga xizmat koʻrsatmoqda. Harakat vaqti — 05:30 dan 22:50 gacha.

Eslatib oʻtamiz, Shavkat Mirziyoyev 9 iyul kungi yigʻilishda endi Toshkent shahri va viloyatlararo qatnov boʻyicha alohida yondashuv boʻlishi, xususan, Toshkent halqa yoʻligacha kelayotgan 20 ta avtobus yoʻnalishi 15−20 kilometrga uzaytirilib, yana yangi 6 ta marshrut qoʻshilishini maʼlum qilgandi. Vazirlik qayd etishicha, ushbu topshiriqlar ijrosi yuzasidan Toshkent viloyatining barcha hududlarini poytaxt bilan bogʻlash boʻyicha amaliy ishlar davom etmoqda.