Yangi Toshkent xalqaro aeroportiga metro yoʻli quriladi

Davlat rahbarining taʼkidlashicha, 1310 gektar hududda qurilayotgan mazkur aeroport samolyotlar parkini 180 ta samolyot bilan toʻldirilsa, bu Oʻzbekiston iqtisodiyotiga yiliga 700 million dollar daromad keltiradi.

«Biz tanlagan joy xavfsizlik, uchish va qoʻnish nuqtai nazaridan eng moʻʼtadil. Aeroport Toshkent va Yangi Toshkent chorrahasida joylashgan. Unga koʻpi bilan 25 daqiqada yetib boriladi — masofa 24 km. Biroq, biz qatnovlarni tashkil qilamiz, Xudo xohlasa, u yerda metro quramiz. Hammasi uygʻunlik bilan amalga oshiriladi», – dedi prezident.

Mirziyoyev oʻz nutqida yaqin besh yil ichida qoʻshimcha 75 ta yangi samolyot sotib olish rejasini ham maʼlum qildi. 2030 yilgacha yoʻnalishlar sonini 230 taga, ichki va xalqaro reyslar hajmini esa yiliga 200 mingtaga yetkazish rejalashtirilgan.

Eslatib oʻtamiz, 15 oktabr kuni prezident Toshkent viloyatidagi yangi xalqaro aeroport loyihasini koʻzdan kechirdi va boʻlajak aeroportga tamal toshini qoʻyib, qurilish ishlarini rasman boshladi.