"Yomgʻirdan soʻng chiqadigan chuvalchanglar, bir tiyinga qimmat blogerchalar". Oʻrmon xoʻjaligi agentligi matbuot rahbari nimaga sha'ma qildi?

Bundan ikki kun oldin, yaʼni 30 sentabr kuni Toshkent viloyati Qibray tumanida joylashgan Toshkent davlat agrar universiteti binosi yonib ketdi. Voqeani yoritish maqsadida hududga OAV vakillari bordi. Biroq ular vaziyatni xalqqa ochiq koʻrsatishga harakat qilishsa ham post patrul xizmati xodimlari hamda universitet nozirlari tomonidan ichkariga qoʻyilmadi va bu holat tarmoqlarda aylandi. Aynan shu vaziyat Oʻrmon xoʻjaligi agentligi axborot xizmati rahbariga yoqmagan. Yulduz Oripova bu holatni ijtimoiy tarmoqda oʻzicha talqin qilgan. Unga koʻra, mazkur yongʻin uyushtirilgan.

"Falokat boshlanganda ishxonada edim, ayollarimizga soat beshgacha ish kuni, yaʼni bayram munosabati bilan ruxsat berildi. Rahbariyat, boʻlim boshliqlarining hammasi ishda edi! Tutun hidi boshida sezildi, keyin esa oʻsha kinolarda koʻrgan kadrlar "Apokalipsis" boshlandi! Agrar yonayotgandi, dahshat yondi, hamma tashqariga oʻzini urdi, keyin olov shiddat bilan bizning binoyimizga oʻtib, tomni va toʻrtinchi qavatimizni egalladi. Oʻt oʻchiruvchi uskunalar yordamida bartaraf etildi, lekin Agrar universiteti juda katta zarar koʻrdi! Tegishli vazirliklar rahbarlari hammasi yetib kelishdi. Bir narsani aytishim mumkin, shaxsiy fikrim, bu fojia, yaʼni yongʻin uyushtirilgan! 100 foiz!", degan Oripova.

Shuningdek, u yuqoridagi yongʻinni yoritishga kelgan bloger hamda jurnalistlarni shoqolga oʻxshab, hech narsani bilmasdan turib, vaziyatni yoritishga keldi, deya ularga taʼrif bergan.

"Meni taajjubga solgan holat shu boʻldiki, yomgʻirdan soʻng chiqadigan chuvalchanglarga oʻxshab bir tiyinga qimmat blogerchalar shoqolga oʻxshab, vaziyatni bilmasdan turib, shou yaratish asnosida binoyimiz atrofida likillashdi. Yo ajab! Xususiy telekanalning bir tiyinga qimmat muxbirchalari esa oʻzini vallomatday tutib, ichkariga kirmoqchi boʻlishdi, lekin Ichki ishlar vazirligi hamda Favqulodda vaziyatlar vazirligi xodimlari ularning kovushini toʻgʻrilab qoʻyishdi! Rosa pitirladi, provokatsiya qilishdi, oʻzlarini goʻyoki dunyoning piridek tutishdi, tarbiyasizlar, 18, 19 yoshga kirgan bolachalar! qanday qilib va qachon bular jurnalist boʻlishga ulgurishdi?! Xullas, mendan eshitadiganini eshitdi!" deya qoʻshimcha qilgan Oʻrmon xoʻjaligi matbuot rahbari.

Biroq OAV vakillariga shuncha gap aytilsa ham yuqoridagi holat yuzasidan hech bir davlat tashkiloti jurnalist hamda blogerlarni tahqirlagan, kurakda turmaydigan gaplar bilan haqorat qilgan davlat xodimiga chora koʻrgani haqida maʼlumot bermadi. Agentlik ham jim. Qachongacha jurnalistlar davlatning yuqori lavozimlarda ishlaydigan xodimlari tomonidan kamsitiladi? Ularga qonuniy chora koʻriladimi oʻzi? Nega Jurnalistlar uyishmasi bunga munosib javob bermaydi?!

Maʼlumot uchun, Yulduz Oripova shoir Abdulla Oripovning qizi. Bugungi kunda u Oʻrmon xoʻjaligi raisining maʼnaviyat boʻyicha maslahatchisi hamda agentlikning matbuot xizmati rahbari.

Javohir Yo‘ldoshov