Joriy yil oktabr oyining soʻnggi kunlaridan noyabr oyining birinchi yarmiga qadar oʻtkazilishi rejalashtirilgan mazkur tadbir birinchi marta YuNESKOning Parij shahridagi qarorgohidan boshqa joyda boʻlib oʻtadi. Bu voqea tashkilotning 80 yilligiga toʻgʻri kelgani bilan ham ahamiyatlidir.

Shavkat Mirziyoyevning 2024 yil 15 martdagi qaroriga koʻra, mazkur tadbirga tayyorgarlik koʻrish boʻyicha tashkiliy qoʻmita tuzilib, zarur chora-tadbirlar amalga oshirilmoqda. Tashkiliy qoʻmita tomonidan sessiya bilan bogʻliq tadbirlarni tashkil etish va oʻtkazish yuzasidan ishchi guruhlar tuzilib, tayyorgarlik ishlari olib borilmoqda. Sessiya ishtirokchilarining kelishi va ketishi, ularga viza rasmiylashtirish, transport va tibbiy xizmatlar koʻrsatish, asosiy tadbirlar va madaniy dasturlarda qatnashishlari masalalari YuNESKO bilan kelishgan holda hal qilinmoqda.

Shu yilning 12 mart kuni prezident Shavkat Mirziyoyev Fransiyaga davlat tashrifi doirasida YuNESKO bosh direktori Odri Azuleni qabul qilib, tashkilot Bosh konferensiyasining 43-sessiyasiga tayyorgarlik koʻrish va uni oʻtkazishning amaliy jihatlarini muhokama qilgan edi. Sessiya va asosiy tadbirlar “Silk Road Samarkand” sayyohlik majmuasida oʻtkaziladi.

Nufuzli delegatsiyalar, tadbir ishtirokchilarini joylashtirish uchun “Silk Road Samarkand” majmuasi hamda Samarqand shahridagi mehmonxonalar shay qilib quyilgan. Bundan tashqari, Toshkent, Buxoro, Xiva va Shahrisabzda madaniy tadbirlar, ekskursiyalar va qabullar oʻtkazilishi hisobga olinib, bu shaharlarda ham mehmonxonalar tanlangan, delegatsiyalarga transport va boshqa xizmatlar koʻrsatilishi yuzasidan zarur chora-tadbirlar koʻrilmoqda.

Sessiya doirasida YuNESKOning Yoshlar forumi, milliy komissiyalar yigʻilishi, ilk bor Beruniy nomidagi Oʻzbekiston-YuNESKO mukofotini topshirish marosimi, muzeylarda sunʼiy intellektning oʻrni boʻyicha xalqaro konferensiya oʻtkaziladi. Bundan tashqari, Samarqanddagi tarixiy-madaniy yodgorliklar, muzeylar, madaniyat maskanlarida xalqaro koʻrgazmalar, yangi ekspozitsiyalar namoyishi, jahon yulduzlari ishtirokida konsert dasturlari, umuman, 150 dan ortiq tadbir rejalashtirilgan.

43-sessiya va boshqa tadbirlarni yoritish uchun Samarqandga keladigan mahalliy va xorijiy ommaviy axborot vositalarini belgilangan tartibda akkreditatsiyadan oʻtkazish va ularga zarur shart-sharoit yaratish borasida ham choralar koʻrilmoqda. “Silk Road Samarkand” majmuasi hududida matbuot markazi tashkil etiladi.

#YuNESKO

Samarqand YuNESKOning 43-sessiyasiga mezbonlik qiladi