Mirziyoyev YuNESKOning 43-sessiyasida qator xalqaro tashabbuslarni ilgari surdi

Prezident taʼlim sohasida maxsus ehtiyojga ega bolalar uchun YuNESKO inklyuziv taʼlim platformasini yaratish, kasbiy taʼlim boʻyicha Butunjaxon sammitini oʻtkazish hamda «Sunʼiy intellekt – maktab» nomli pilot loyihani amalga oshirishni taklif etdi. Shuningdek, sunʼiy intellekt etikasi boʻyicha xalqaro ekspertlar forumini tashkil etish tashabbusi ham bildirildi.

Madaniy meros va raqamli yoʻnalishda prezident 19-noyabrni Xalqaro hujjatli meros kuni sifatida eʼlon qilish, YuNESKO tizimida Raqamli meros xalqaro institutini tashkil etish, hamda 2027-yilda Buxoro shahrida hunarmandchilik va xalq ijodi boʻyicha xalqaro kongress oʻtkazishni taklif qildi.

Shavkat Mirziyoyev ayollar faolligini qoʻllab-quvvatlash maqsadida YuNESKO Ayollar liderligi akademiyasini tashkil etish va Samarqandda taʼlim, fan va madaniyat sohasida faol ayollar ishtirokida Global ayollar forumini oʻtkazish tashabbuslarini ilgari surdi.

Iqlim oʻzgarishi va ekologik muammolar yuzasidan davlat rahbari «YuNESKO ekologik poytaxti» xalqaro tashabbusini yoʻlga qoʻyish, madaniy merosni iqlim oʻzgarishi sharoitida asrash boʻyicha rezolyutsiya ishlab chiqish, hamda Xiva shahrida xalqaro simpozium oʻtkazish takliflarini bildirdi.

Axborot xavfsizligi masalasiga ham toʻxtalar ekan, prezident yolgʻon axborot tarqalishiga qarshi kurashish, jamoatchilik fikrini himoya qilish, bolalar madaniy kontenti boʻyicha xalqaro festival tashkil etish, hamda media savodxonlikni rivojlantirish boʻyicha kompleks strategiya ishlab chiqish tashabbuslarini ilgari surdi.

Shavkat Mirziyoyev nutqi yakunida Oʻzbekistonni madaniyatlararo muloqot, innovatsion taʼlim va inson qadriyatlarini rivojlantirish markaziga aylantirishga intilayotganini taʼkidladi.

«Bizning maqsadimiz — taʼlim, fan, madaniyat va axborot sohalarida umumjahon hamkorligini yanada mustahkamlash», — dedi davlat rahbari.