Samarqandda 14-YuNESKO Yoshlar Forumi start oldi

2025 yilning 27–28 oktabr kunlari Samarqand shahrida 14-YuNESKO Yoshlar Forumi boʻlib oʻtmoqda. Bu yilgi forum «Iqlim harakati va uning ijtimoiy taʼsiri, ayniqsa yoshlar uchun» mavzusiga bagʻishlanib, dunyo boʻylab 140 ta mamlakatdan 150 nafarga yaqin yosh yetakchini birlashtirdi.

YuNESKO va Oʻzbekiston Hukumati hamkorligida oʻtkazilayotgan mazkur nufuzli xalqaro anjuman doirasida interaktiv sessiyalar tashkil qilinib, yoshlar iqlim oʻzgarishi va ijtimoiy masalalarga oid tashabbus va gʻoyalarni muhokama qilmoqda. Forum yoshlar oʻrtasida tajriba almashish, xalqaro hamkorlikni mustahkamlash va global muammolar yechimini topishda faol ishtirok etish imkoniyatini yaratmoqda.

Shu munosabat bilan Oʻzbekistonga Bangladeshning YuNESKOdagi doimiy vakili, Bosh konferensiyaning 43-sessiyasi raisi Xondker Muxammad Talha rasmiy tashrif buyurdi. Uning ishtirokidagi tadbirlar forum ahamiyatini yanada oshirdi.

Forumning Samarqandda oʻtkazilishi shaharning madaniy va tarixiy markaz sifatidagi nufuzini namoyon etmoqda. Jahon hamjamiyati eʼtibori mintaqaning sayyohlik salohiyatini rivojlantirishga xizmat qilmoqda. Bu esa shaharga tashrif buyurgan mehmonlarga uning boy tarixi va madaniy merosi bilan yaqindan tanishish imkonini bermoqda.