106 мингдан ортиқ ўзбекистонлик Россияда қонуний асосда ишга жойлаштирилган

Бу ҳақда Вазирлар Маҳкамаси ҳузуридаги Миграция агентлиги директори Беҳзод Мусаев Тошкентда бўлиб ўтган “МДҲ доирасида ягона меҳнат бозорини шакллантириш контекстида миграция сиёсатини такомиллаштириш” мавзусидаги давра суҳбатида маълум қилди.

Мусаевнинг таъкидлашича:

“Фақатгина шу йилнинг ўзида 320 та россиялик иш берувчи томонидан 150 мингдан ортиқ иш ўрни бўйича таклифлар келиб тушган. Улардан 106 мингдан зиёд фуқаромиз ташкил этилган тарзда ишга жўнатилган”.

Агентлик маълумотларига кўра, ҳозирга қадар Россия билан 97 та ҳамкорлик келишуви имзоланган бўлиб, улар асосан қурилиш, коммунал хўжалик ва транспорт соҳаларига тегишли.

Шунингдек, 50 мингдан зиёд ўзбекистонликлар “Лукойл”, “Газпром”, “Русал”, “КамАЗ”, “АвтоВАЗ” каби йирик стратегик корхоналар ҳамда Татаристондаги “Алабуга” иқтисодий зонаси ва йирик логистика компанияларида меҳнат қилмоқда.

РИА Новости хабарига кўра, 2024 йилда Россияда ташкил этилган меҳнат миграцияси 2023 йилга нисбатан 4,2 баробарга ўсиб, 123,7 минг нафарга етган. Бу эса жорий йилдаги умумий миграциянинг 76,5 фоизини ташкил этган.

Бироқ, умумий ҳисобда Россиядаги ўзбекистонлик меҳнат муҳожирлари сони 2023 йилга нисбатан 1,7 баробарга камайиб, тахминан 700 минг нафарни ташкил этмоқда.