106 mingdan ortiq oʻzbekistonlik Rossiyada qonuniy asosda ishga joylashtirilgan

Bu haqda Vazirlar Mahkamasi huzuridagi Migratsiya agentligi direktori Behzod Musayev Toshkentda boʻlib oʻtgan “MDH doirasida yagona mehnat bozorini shakllantirish kontekstida migratsiya siyosatini takomillashtirish” mavzusidagi davra suhbatida maʼlum qildi.

Musayevning taʼkidlashicha:

“Faqatgina shu yilning oʻzida 320 ta rossiyalik ish beruvchi tomonidan 150 mingdan ortiq ish oʻrni boʻyicha takliflar kelib tushgan. Ulardan 106 mingdan ziyod fuqaromiz tashkil etilgan tarzda ishga joʻnatilgan”.

Agentlik maʼlumotlariga koʻra, hozirga qadar Rossiya bilan 97 ta hamkorlik kelishuvi imzolangan boʻlib, ular asosan qurilish, kommunal xoʻjalik va transport sohalariga tegishli.

Shuningdek, 50 mingdan ziyod oʻzbekistonliklar “Lukoyl”, “Gazprom”, “Rusal”, “KamAZ”, “AvtoVAZ” kabi yirik strategik korxonalar hamda Tataristondagi “Alabuga” iqtisodiy zonasi va yirik logistika kompaniyalarida mehnat qilmoqda.

RIA Novosti xabariga koʻra, 2024 yilda Rossiyada tashkil etilgan mehnat migratsiyasi 2023 yilga nisbatan 4,2 barobarga oʻsib, 123,7 ming nafarga yetgan. Bu esa joriy yildagi umumiy migratsiyaning 76,5 foizini tashkil etgan.

Biroq, umumiy hisobda Rossiyadagi oʻzbekistonlik mehnat muhojirlari soni 2023 yilga nisbatan 1,7 barobarga kamayib, taxminan 700 ming nafarni tashkil etmoqda.