Америкада вертолёт билан тўқнашган йўловчи самолёти дарёга қулаб тушди. Нималар маълум? (Фото)

American Airlines компаниясига тегишли 60 йўловчи ва тўрт экипаж аъзосидан иборат бўлган PSA Airlines самолёти Рональд Рейган номидаги Вашингтон Миллий аэропортига яқинлашганда ҳарбий вертолёт билан тўқнашиб кетади. Шундан сўнг йўловчи самолёти бир нечта бўлакларга бўлиниб, дарёга тушади ҳамда чўкиб кетади, вертолёт эса сув устида қалқиб қолади. 

Вашингтон шаҳар мери Мюриэл Баузернинг айтишича, Sikorsky H-60 вертолёт бортида ўқув парвозини амалга ошираётган АҚШнинг уч аскари бўлган. Воқеа содир бўлганидан бир оз муддат ўтиб, Федерал агентлик ушбу ҳолатни Миллий транспорт хавфсизлиги кенгаши (NTSB) билан биргаликда назоратга олганини маълум қилган. 

Қанча одам ҳалок бўлди? 

"CBS news"га очиқланган маълумотга кўра, тўқнашув сабаб камида 19 киши ҳалок бўлган. Аммо расмийлар томонидан бу рақамлар ҳали тасдиқланмади. Самолётдагиларнинг аксарияти спортчилар, мураббийлар ва уларнинг оила аъзолари бўлгани айтилмоқда. 

Йўловчилар орасида Россия фуқаролари, фигурали учиш бўйича мураббийлар, собиқ жаҳон чемпионлари — Евгения Шишкова ва Вадим Наумов ҳам бўлгани Кремль томонидан тасдиқланди.

Вашингтондаги Ёнғин ва фавқулодда вазиятлар хизмати бошлиғи Жон Доннеллининг айтишича, ҳозирда резина қайиқларда 300 га яқин қутқарувчилар одамларни сувдан олиб чиқмоқда. 

АҚШ расмийлари нима демоқда? 

Президент Дональд Трамп воқеа бўйича баёнот бериб, вазиятдан тўлиқ бохабар эканлигини маълум қилди. Вице-Президент Жеймс Дэвид Вэнс эса ҳалок бўлганлар учун ибодат қилишни айтди. 

Яқинда тайинланган Мудофаа вазири Пит Хегсет ва Транспорт котиби Шон Даффи ҳам вазиятни назоратга олганликларини билдирди. 

American Airlines компанияси бош директори Роберт Исом авиакомпания веб-сайтига жойлаштирилган видеода тўқнашув ҳақидаги "чуқур қайғусини" билдирди.