Amerikada vertolyot bilan toʻqnashgan yoʻlovchi samolyoti daryoga qulab tushdi. Nimalar maʼlum? (Foto)

American Airlines kompaniyasiga tegishli 60 yoʻlovchi va toʻrt ekipaj aʼzosidan iborat boʻlgan PSA Airlines samolyoti Ronald Reygan nomidagi Vashington Milliy aeroportiga yaqinlashganda harbiy vertolyot bilan toʻqnashib ketadi. Shundan soʻng yoʻlovchi samolyoti bir nechta boʻlaklarga boʻlinib, daryoga tushadi hamda choʻkib ketadi, vertolyot esa suv ustida qalqib qoladi. 

Vashington shahar meri Myuriel Bauzerning aytishicha, Sikorsky H-60 vertolyot bortida oʻquv parvozini amalga oshirayotgan AQShning uch askari boʻlgan. Voqea sodir boʻlganidan bir oz muddat oʻtib, Federal agentlik ushbu holatni Milliy transport xavfsizligi kengashi (NTSB) bilan birgalikda nazoratga olganini maʼlum qilgan. 

Qancha odam halok boʻldi? 

"CBS news"ga ochiqlangan maʼlumotga koʻra, toʻqnashuv sabab kamida 19 kishi halok boʻlgan. Ammo rasmiylar tomonidan bu raqamlar hali tasdiqlanmadi. Samolyotdagilarning aksariyati sportchilar, murabbiylar va ularning oila aʼzolari boʻlgani aytilmoqda. 

Yoʻlovchilar orasida Rossiya fuqarolari, figurali uchish boʻyicha murabbiylar, sobiq jahon chempionlari — Yevgeniya Shishkova va Vadim Naumov ham boʻlgani Kreml tomonidan tasdiqlandi.

Vashingtondagi Yongʻin va favqulodda vaziyatlar xizmati boshligʻi Jon Donnellining aytishicha, hozirda rezina qayiqlarda 300 ga yaqin qutqaruvchilar odamlarni suvdan olib chiqmoqda. 

AQSh rasmiylari nima demoqda? 

Prezident Donald Tramp voqea boʻyicha bayonot berib, vaziyatdan toʻliq boxabar ekanligini maʼlum qildi. Vitse-Prezident Jeyms Devid Vens esa halok boʻlganlar uchun ibodat qilishni aytdi. 

Yaqinda tayinlangan Mudofaa vaziri Pit Xegset va Transport kotibi Shon Daffi ham vaziyatni nazoratga olganliklarini bildirdi. 

American Airlines kompaniyasi bosh direktori Robert Isom aviakompaniya veb-saytiga joylashtirilgan videoda toʻqnashuv haqidagi "chuqur qaygʻusini" bildirdi.