АҚШ Ўзбекистон учун Жексон-Вэник тузатишини бекор қилади

«Бугун бу ерга йиғилган етакчилар мураккаб геосиёсий муҳитда бўлган давлатлар вакилларидир. Биз буни тушунамиз. Сизлар қудратли мамлакатлар ўртасида қолган буюк миллатларсиз. Бугунги учрашув ҳамкорлигимизни мустаҳкамлаш ва мамлакатларингиз ўз тақдирини ўзи белгилашини таъминлаш учун имкониятдир», - деди сенатор.

«Беқарор Россия ва тобора тажовузкор бўлиб бораётган Хитой ўз миллий манфаатларини бутун дунё бўйлаб, кўпинча қўшнилари ҳисобидан илгари сураётган бир пайтда, Қўшма Штатлар Марказий Осиё мамлакатларига ишончли шерик билан ҳамкорлик қилиш ва ўзаро иқтисодий ривожланиш учун ҳақиқий имкониятни таклиф қилмоқда».

Сенатор, шунингдек, Конгрессга АҚШнинг C5+1 форматидаги ҳамкорлар билан иқтисодий ҳамкорлигидаги тўсиқларни бартараф этишга қаратилган қонун лойиҳаси киритилганини маълум қилди:

«Ушбу йўналишни қўллаб-қувватлаш мақсадида мен сенатор [Стив] Дейнс ва ҳамкасбларим билан биргаликда шу ҳафта C5+1 форматидаги ҳамкорларимиз билан иқтисодий ҳамкорликни ривожлантириш йўлидаги эскирган тўсиқларни бартараф этишга қаратилган қонун лойиҳасини тақдим этдим. Гап Жексон-Вэник тузатиши чекловларини бекор қилиш ҳақида кетмоқда».

Бу тузатиш совуқ урушнинг қоқ чўққисида, 1974 йилда қабул қилинган. У АҚШнинг «Савдо тўғрисидаги қонуни»га киритилган бўлиб, инсон ҳуқуқлари бузилаётган давлатлар билан савдо муносабатларини ўрнатишда чекловлар киритилишини кўзда тутади. 

Икки конгрессмен – Ҳенри Жексон ва Чарлз Вэникнинг ташаббуси билан, ўша 1974 йилда СССРдаги инсон ҳуқуқлари бузулиши, жумладан совет фуқароларига эмин-эркин кўчиб кетиш ҳуқуқи берилмаётганига қарши, жазо чораси сифатида ушбу тузатиш киритилган эди.

АҚШ Бош котиби Марко Рубио бу тузатишни «эскилик сарқити» деб атаган ва уни бекор қилиш кераклигини айтган.