Австралияда соҳилга чиқиб қолган 90 та кит ўлдирилди

Австралиянинг энг жанубида жойлашган Тасмания оролларидаги соҳил бўйидан 150 дан ортиқ кит топилди, улардан 90 таси ҳалок бўлди. Бу ҳақда Тасмания Табиий ресурслар ва атроф-муҳит департаментига таянган ҳолда CNN нашри хабар берди.

Жаҳон

19.02.2025, 11:14

Lotinchada

Улашиш:

Avstraliyada sohilga chiqib qolgan 90 ta kit oʻldirildi

Тасмания Табиий ресурслар ва атроф-муҳит департаментига кўра, кеча, 18 январь куни кечқурун оролнинг ғарбий қисмида, Артур дарёси яқинида 150 дан ортиқ кит қирғоққа чиқиб қолган. Қутқарувчилар улардан иккитасини денгизга қайтаришга уринишган бўлса-да, кучли шамол ва тўлқинлар туфайли улар қирғоққа қайтиб чиққан.

"Денгизда ҳайвонлар тўлқинларни енгиб ўта олишмаяпти. Улар қайта-қайта орқага бурилиб, пляж томон қайтишмоқда", дейди Тасмания Парклар ва ёввойи табиат хизмати ходими Шеллей Граҳам.

Юқоридан олган кадрларда китларнинг пляж бўйлаб ёйилиб ётганини, баъзилари қумга қисман кўмилиб қолганини, бошқалари эса саёз сувда тошли жойларга сиқилиб қолганини кўриш мумкин.

Тасманияда сўнгги марта китларнинг бу қадар катта қурбонлиги бундан 50 йил олдин, 1974 йил июнь ойида юз берган. Ўшанда оролнинг шимолий қирғоғидаги Блэк-Ривер пляжидан 160-170 га яқин кит топилган эди. Улардан қанчаси омон қолганлиги эса номаълум.

Сўнгги фожиали ҳодисада расмийлар китларнинг азобини камайтириш учун уларни ўлдиришга қарор қилган. Пляжда узоқ соатлар давомида қолиб кетган ҳайвонлар буткул ҳолдан тоиб, стрессга тушиб қолган. Шундан сўнг улар мутахассислар томонидан ўлдирилган.

Маълумот учун, Тасманияда китлар, ҳатто нобуд бўлган тақдирда ҳам, ҳимоя остидаги тур ҳисобланади. Уларнинг жасадига тегиш ёки бўлакларга бўлиш қонунбузарлик саналади. Ҳайвонлар хулқ-атвори бўйича мутахассислар ва денгиз олимлари қирғоққа чиқиб қолган китларнинг омон қолиш эҳтимоли жуда паст эканлигини таъкидлашган. Улар қуруқликда олти соат атрофида омон қолиши мумкин.

Жаҳон

19.02.2025, 11:14

Улашиш:

#Австралия #Тасмания #кит

машҳур янгиликлар