Avstraliyada sohilga chiqib qolgan 90 ta kit oʻldirildi

Tasmaniya Tabiiy resurslar va atrof-muhit departamentiga koʻra, kecha, 18 yanvar kuni kechqurun orolning gʻarbiy qismida, Artur daryosi yaqinida 150 dan ortiq kit qirgʻoqqa chiqib qolgan. Qutqaruvchilar ulardan ikkitasini dengizga qaytarishga urinishgan boʻlsa-da, kuchli shamol va toʻlqinlar tufayli ular qirgʻoqqa qaytib chiqqan.

"Dengizda hayvonlar toʻlqinlarni yengib oʻta olishmayapti. Ular qayta-qayta orqaga burilib, plyaj tomon qaytishmoqda", deydi Tasmaniya Parklar va yovvoyi tabiat xizmati xodimi Shelley Graham.

Yuqoridan olgan kadrlarda kitlarning plyaj boʻylab yoyilib yotganini, baʼzilari qumga qisman koʻmilib qolganini, boshqalari esa sayoz suvda toshli joylarga siqilib qolganini koʻrish mumkin. 

Tasmaniyada soʻnggi marta kitlarning bu qadar katta qurbonligi bundan 50 yil oldin, 1974 yil iyun oyida yuz bergan. Oʻshanda orolning shimoliy qirgʻogʻidagi Blek-River plyajidan 160-170 ga yaqin kit topilgan edi. Ulardan qanchasi omon qolganligi esa nomaʼlum. 

Soʻnggi fojiali hodisada rasmiylar kitlarning azobini kamaytirish uchun ularni oʻldirishga qaror qilgan. Plyajda uzoq soatlar davomida qolib ketgan hayvonlar butkul holdan toib, stressga tushib qolgan. Shundan soʻng ular mutaxassislar tomonidan oʻldirilgan. 

Maʼlumot uchun, Tasmaniyada kitlar, hatto nobud boʻlgan taqdirda ham, himoya ostidagi tur hisoblanadi. Ularning jasadiga tegish yoki boʻlaklarga boʻlish qonunbuzarlik sanaladi. Hayvonlar xulq-atvori boʻyicha mutaxassislar va dengiz olimlari qirgʻoqqa chiqib qolgan kitlarning omon qolish ehtimoli juda past ekanligini taʼkidlashgan. Ular quruqlikda olti soat atrofida omon qolishi mumkin.