Бухорода ёввойи ҳайвон гўштидан таом тайёрланаётгани айтилмоқда

Унда ёзилишича, мазкур ҳолат Қоракўл тумани Қувача қишлоғидаги "Тangem" номли ошхонада кузатилган. Ошхона номи остида очилган Instagram'даги "food.travel" блогида юқоридаги ҳолат юзасидан видео эълон қилинган.

"Ушбу видеода ошхона вакиллари ёввойи ҳайвон гўштларини онкология ва бошқа касалликларга даво сифатида тавсия қилаётгани тасвирланган. Ушбу иддаолар кўпгина саволлар ва шубҳаларни келтириб чиқарди, чунки бу каби баёнотларнинг илмий асослари келтирилмаган", дейилади хабарда.

"Ekologuz" жамоаси мазкур ошхона вакилларидан ушбу даъволарни илмий далиллар билан асослаб беришларини талаб қилган ва бундай ноҳақ ахборот жамоатчиликнинг соғлиги учун хавф туғдириши мумкинлигини эслатиб ўтган. 

Бундан ташқари, хабарда ошхона томонидан ишлатилаётган ёввойи ҳайвонлар гўшти қаердан олингани номаълум эканлиги ҳам айтилган. Жамоа ушбу жараёнлар қонуний рухсатлар асосида амалга оширилаётганлигини аниқлаш ва атроф-муҳитни муҳофаза қилиш нуқтаи назаридан текшириш учун, Бухоро вилояти Экология, атроф-муҳитни муҳофаза қилиш ва иқлим ўзгариши бошқармаси томонидан "Tangem" ошхонаси фаолияти ўрганилишини сўраган. 

Шунингдек, Бухоро вилояти Ички ишлар бошқармасидан видеода ёввойи ҳайвон гўшти касалликларга даво эканлиги ҳақидаги иддаоларни ёлғон ахборот деб ҳисоблаб, видеодаги шахсларнинг ҳаракатларига ҳуқуқий баҳо беришини талаб қилган.

"Илмий бўлмаган va асоссиз даъволарни оммавий тарқатиш жамоатчиликни чалғитиш ва уларнинг соғлиғига хавф туғдириши мумкин, шу сабабдан бу каби ҳолатларни қонуний назоратга олиш муҳим", дея қўшимча қилинган ташкилот иддаосида.