Трамп: Австралия эронлик аёл футболчиларга бошпана бериш керак

Бу ҳақда ABC News хабар берди.

Эронлик беш нафар аёл футболчи — Фотима Пасандиде, Заҳро Ганбари, Заҳро Сарбали, Отифа Рамазонзода ва Мона Ҳамудий март ойи бошида аёллар ўртасидаги Осиё кубогининг очилиш ўйинида Жанубий Кореяга қарши баҳсдан аввал Эрон давлат мадҳиясини куйлашдан бош тортган эди.

Ушбу ҳаракатдан сўнг спортчилар Эрон давлат ОАВ томонидан кескин танқидга учради. Жамоанинг ушбу беш нафар аъзоси Gold Coast шаҳридаги меҳмонхонада ўз назоратчиларидан қочиб кетишга муваффақ бўлган ва ҳозирда Queensland полицияси ҳимоясида хавфсиз жойда қолмоқда. Фаоллар ва спортчиларнинг яқинларига кўра, агар улар ватанига қайтса, шафқатсиз таъқиблар, ҳатто ўлим жазосига дучор бўлиши мумкин.

Трамп ўзининг Truth Social платформасида Австралия бош вазири Anthony Albaneseга қарата очиқ мурожаат йўллади.

«Австралия Эрон аёллар миллий футбол жамоасига Эронга қайтишга рухсат бериб, даҳшатли гуманитар хатога йўл қўймоқда, у ерда улар ўлдирилиши мумкин», — деб ёзди АҚШ президенти Truth Social ижтимоий тармоғида.

Агар Австралия спортчиларга бошпана бермаса, буни АҚШ амалга оширади, деди Дональд Трамп. Унинг сўзларига кўра, у Австралия бош вазири билан шу мавзуда суҳбатлашган.

New South Wales штатининг қулликка қарши кураш бўйича комиссари James Cockayne жамоанинг қолган аъзоларига нисбатан «замонавий қуллик» аломатлари борлигини текширишни талаб қилди. Унинг айтишича, футболчиларга меҳмонхонадан кузатувчиларсиз чиқиш тақиқланган, уларнинг сўз ва ҳаракат эркинлиги чекланган.

«Эрон ҳукумати спортчилар ва уларнинг оилаларига таҳдид қилиб, сиёсий мухолифатни бостириш учун улардан фойдаланиши барчага маълум», дея қўшимча қилди Cockayne.

Эроннинг сўнгги шоҳи ўғли ва сургундаги валиаҳд шаҳзодаси Ризо Паҳлавий ҳам Instagram’да ушбу спортчиларни қўллаб-қувватлади. У беш нафар аёл футболчи жамоа лагерини тарк этиб, хавфсиз жойга ўтганини ва «Эрон миллий шер ва қуёш инқилоби»га (Lion and Sun Revolution) қўшилганини эълон қилди.