Четдан олиб келинган қарийб 80 кг наркотик моддалар тўхтатиб қолинди

Давлат хавфсизлик хизматининг Чегара қўшинлари ва Сурхондарё вилояти бўйича бошқармаси ҳамда вилоят ички ишлар бошқармаси ходимлари ҳамкорлигида Узун туманида ўтказилган тезкор тадбирда, 2005 ва 2006 йилларда туғилган 2 нафар маҳаллий фуқаро 20 кг 374 гр “опий” ва 41 кг 668 гр “гашиш” гиёҳвандлик воситаларини Тожикистон Республикасидан контрабанда йўли билан олиб келган вақтларида ушланди.

Шундан сўнг тезкор тадбир давом эттирилиб, уларнинг жиноий шериги бўлган, Узун туманида яшовчи, 2004 й.т. шахс ҳамда ажал оғусининг бюртмачиси ҳисобланган, Денов туманида истиқомат қилувчи, 2000 й.т. фуқаро ҳам процессуал тартибда ушланди. 

Чегара қўшинлари ҳарбий хизматчилари ва ДХХ Тошкент вилояти бўйича бошқармаси ҳамда вилоят божхона бошқармаси ходимлари ҳамкорлигида ўтказилган тезкор тадбирда эса, Қозоғистон Республикасидан халқаро ўтказиш пункти орқали мамлакатимизга кириб келган Фарғона вилоятининг Тошлоқ туманида яшовчи, 1991 й.т. шахсга тегишли юклар ўрнатилган тартибда текширилди.

Натижада мармар қуйма тош ичига яширилган 7 кг 902 гр “Мефедрон” синтетик гиёҳвандлик воситаси борлиги маълум бўлди.

Терговга қадар текширув давомида, наркокуръер моддий манфаатдорлик эвазига ушбу гиёҳвандлик воситасини Россия Федерациясининг Москва шаҳрида номаълум шахс томонидан телеграм бот орқали кўрсатилган манзилдан олиб, Ўзбекистондаги буюртмачига етказиб бериши кераклиги аниқланди.

Сўнгра тезкор тадбир давом эттирилиб, Бекобод туманида истиқомат қилувчи, 1985 й.т. фуқаро Ўрта Чирчиқ туманида ажал оғусини қабул қилиб олган вақтида ушланди.

Давлат хафсизлик хизматининг Фарғона ва Сурхондарё вилоятлари бўйича бошқармалари ходимлари томонидан амалга оширилган тезкор-қидирув тадбирлари натижасида афғонистонлик наркосавдогарлардан гиёҳвандлик воситаларини олиб, Фарғона вилоятида сотиш билан шуғулланган шахслар фаолиятига чек қўйилди. 

Хусусан, Қўқон шаҳрида яшовчи, 1964 й.т. аёл ва унинг 1993 й.т., муқаддам гиёҳвандлик воситалари савдоси билан боғлиқ жинояти учун судланган ўғли қўлга олиниб, улардан Афғонистондан контрабанда йўли билан келтирилган 5 кг 878 гр “опий” ва 3 кг 922 гр “гашиш” моддалари ашёвий далил сифатида олинди.

Ўтказилган тезкор тадбирлар давомида хориждан олиб келинган жами 79 кг 744 гр гиёҳвандлик воситаларининг ноқонуний айланмасига чек қўйилди.

Ҳозирда мазкур шахсларнинг барчасига нисбатан Жиноят Кодексининг 246 ва 273-моддалари билан жиноят ишлари қўзғатилиб, қамоқ эҳтиёт чораси қўлланилди. Тергов ҳаракатлари олиб борилмоқда.