ДХХ: Тошкент вилоятида прокуратура ходимлари 25 минг доллар билан ушланди

Маълум бўлишича, Бош прокуратура ҳузуридаги Иқтисодий жиноятларга қарши курашиш департаментининг Гулистон туман бўлими бошлиғи ва Бекобод шаҳар бўлими катта тезкор вакили фуқародан 25 минг доллар пора олаётганда ашёвий далиллар билан ушланган.

Тергов маълумотларига кўра, улар Зангиота туманидаги 4 та МЧЖга оид жиноят ишини улар фойдасига ҳал этиш ҳамда Сирдарё вилояти Солиқ бошқармаси томонидан ўтказилган текширувларни “нўқонуний” деб топишни ваъда қилишган.

Шунингдек, жиноят иши доирасида улар МЧЖ раҳбаридан аввалроқ 108 минг доллар олгани ҳам аниқланган.

Ҳозирда гумонланувчиларга нисбатан Жиноят кодексининг 168-моддаси 4-қисми “а” банди ва 28, 211-моддаси 3-қисми “а” банди билан жиноят иши қўзғатилиб, уларга нисбатан қамоқ эҳтиёт чораси қўлланилган. Тергов ҳаракатлари давом этмоқда.