Тошкентда сохта ДХХ ва ПА ходими 3,5 йилга қамалди

Тошкент шаҳрида ўзини Президент администрацияси ва Давлат хавфсизлик хизмати ходими сифатида таништириб юрган шахсга ҳукм ўқилди, дея хабар бермоқда Тошкент шаҳри Ички ишлар бош бошқармасига таяниб Газета.uz нашри.

Қайд этилишича, пойтахтнинг Яккасарой тумани Шота Руставели кўчасидаги тезкор тадбирда ЙПХ ходимлари томонидан фуқаро Жавоҳир Орифжонов бошқарувидаги Lacetti тўхтатилган. Ҳужжатларни текшириш жараёнида ҳайдовчи ўзини ДХХ ходими эканини айтиб, йўл-патрул хизмати инспекторларига ДХХга тегишли бўлган гувоҳнома кўрсатган.

Шунингдек, Орифжонов уни қўйиб юборишларини илтимос қилиб, гўёки юқори лавозимда ишловчи раҳбар танишига қўнғироқ қилган. Ушбу шахс ЙҲХ бошқармаси ходимига уни қўйиб юбориш бўйича кўрсатма берган.

Аммо ҳуқуқни муҳофаза қилувчи орган ходимлари ўзини шубҳали тута бошлаган шахснинг маълумотларини текшириб кўрган. Натижада фуқаро кўрсатган хизмат гувоҳномаси қалбаки экани, ДХХга умуман алоқаси йўқлиги маълум бўлган. Гумонланувчи шу жойнинг ўзида ашёвий далиллар билан қўлга олинган.

Олиб борилган суриштирувлар натижасида Жавоҳир Орифжоновнинг қатор бошқа ишлари ҳам ошкор бўлган. У, одатда, ўзини президент администрацияси ва ҳуқуқни муҳофаза қилувчи органлар ходими сифатида таништирган ҳамда сохта мансабдор шахс сифатида шахсий масалаларини ҳал қилиб келган. Бунда у олдиндан тайёрлаб олган сохта гувоҳномалардан фойдаланган.

«Мен ўзимни президент администрациясида ишловчи Алишер ака Сулаймонов деб таништирганман. Ундан кейин ўзим яна қайтиб чиқиб, ўша кишининг жияни бўламан, илтимос, озгина ёрдамингиз керак, деб ўзимнинг ишларим тезроқ ҳал бўлиши учун ёрдам сўраганман. Жудаям нотўғри бу, кечиринглар мени», — деди 33 ёшли эркак.

Суд ҳукми билан Жавоҳир Орифжонов Жиноят кодексининг 228-моддаси (Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) 2-қисми «а», «б» бандлари ва 228-моддаси 3-қисмида назарда тутилган жиноятни содир қилишда айбли деб топилган. Унга узил-кесил 3 йил 6 ой муддатга озодликдан маҳрум қилиш жазоси тайинланган. Жазони манзил колонияларда ўташ белгиланган.

Тошкент шаҳри ИИББ Жавоҳир Орифжоновнинг жиноятларидан жабр кўрган фуқаролардан яқин орадаги ишчи ишлар органларига ёки 102 рақамига хабар беришларини сўради.