"Пиковит" - "Пивовит" номи билан чиқарилган. Наманганда қалбаки дори воситалари фош этилди

Давлат хавфсизлик хизмати, Иқтисодий жиноятларга қарши курашиш департаменти ҳамда Божхона қўмитаси ходимлари ҳамкорлигида ноқонуний дори воситалари айланмасига қарши курашиш йўналишида Наманган шаҳрида тезкор тадбир ўтказилди. 

Тадбир давомида биологик фаол қўшимчалар ишлаб чиқариш билан шуғулланувчи масъулияти чекланган жамият раҳбари томонидан белгиланган тартиб-қоидаларга зид равишда дори воситаларини тайёрлаш мақсадида ташкил этилган цех кўздан кечирилди.

Текширув жараёнида ноқонуний цехда 5,6 миллиард сўмлик 23 дона турли ҳажмдаги махсус идишлар ашёвий далил сифатида расмийлаштирилди. Шунингдек, ўртача 30 миллиард сўмлик товар-моддий бойликлар аниқланди. Хусусан,

• қиймати 1,2 миллиард сўмдан ортиқ бўлган 9 турдаги 138 031 қути дори воситалари ва биологик фаол қўшимчалар,
• 1,8 миллиард сўмлик прекурсорлар,
• 3,4 миллиард сўмлик флакон, қопқоқ, қути ва этикеткалар,
• 18 миллиард сўмлик 14 номдаги ишлаб чиқариш ускуналари,
• ҳамда 5,6 миллиард сўмлик 23 дона катта ва кичик ҳажмдаги махсус идишлар ашёвий далил сифатида расмийлаштириб олинди.

Қўлбола дори воситалари турли вилоятларга тарқатилган

Текширув жараёнида аниқланишича, қўлбола усулда тайёрланган ушбу дорилар Фарғона водийси, Тошкент шаҳри ва бошқа вилоятларга етказиб берилган.

Ҳозирда қалбаки дори воситалари бўйича экспертиза тайинланиб, суриштирув ишлари олиб борилмоқда.