Уй шароитида тайёрланган консерваларни истеъмол қилса бўладими?

Санитария–эпидемиология қўмитаси бўлим бошлиғи Анвар Шукуровга кўра, уй шароитида тайёрланган консерва маҳсулотлари инсон саломатлигига хавф солади. Чунки ушбу маҳсулотлар истеъмоли ортидан одамларда ботулизм касаллиги юзага келмоқда. 

"Ботулизм эса озиқ-овқат маҳсулотларидан заҳарланишлар ичида энг оғир кечадиган хасталиклардан бири. Бу хасталик кўп ҳолларда уй шароитида санитария қоида ва меъёрларига риоя қилинмай тайёрланган сабзавотли, асосан, бодринг, помидор, бақлажон ва қўзиқорин консерваларини истеъмол қилиш оқибатида келиб чиқмоқда", дейди у.

Ботулизм қандай касаллик, унинг оқибати нималарга олиб келади? 

Ботулизм вируси ташқи муҳитга ўта чидамли бўлиб, 100 даражада 6 соат, 120 даражада эса 10 дақиқагача тирик бўлади. Ўзида зарарли моддани сақловчи консерва маҳсулотларини истеъмол қилиш сабабли турли салбий оқибатлар, ҳатто, ўз вақтида тиббий ёрдам кўрсатилмаганда ўлимга олиб келувчи энг оғир турдаги заҳарланишдан келиб чиқади. 

Хасталикнинг яширин даври 2-4 соатдан 14 кунгача давом этиши мумкин. Ботулизм микробининг токсини асосан марказий асаб тизимига таъсир этади ва организмда турли ўзгаришларга олиб келади. 

Ботулизм аломатлари қандай юзага чиқади? 

Ботулизмга чалинган беморларнинг нафас олиши қийинлашиши, оғиз-томоқнинг қуриши, жисмлар кўзга иккита бўлиб кўриниши (диплопия), кўз қовоқлари осилиб қолиши (птоз), ютиниш қийинлашиши ҳамда умумий ҳолсизланиш, кўнгил айниши ва қусиш (кўпинча такрорланади), қорин соҳасидаги оғриқ каби белгилар намоён бўлади. Бундан ташқари, беморнинг сўзлари тушунарсиз бўлиб қолади, бўйин ва оёқ мушакларининг заифлашиши натижасида юришга қийналади. 

Ботулизмни олдини олиш учун нима қилиш керак? 

Анвар Шукуровга кўра, мазкур касалликни олдини олиш учун уй шароитида консерваларни тайёрламаслик керак. Бозор ва аҳоли гавжум жойларда фуқаролар томонидан сотилаётган, номаълум шароитда тайёрланган, сифати кафолатланмаган консерваларни харид қилмаслик лозим. 

Шунингдек, банка қопқоғи кўтарилган (бомбаж), шунингдек, рангида ўзгариш бўлган консерваларни истеъмол қилмаслик, озиқ-овқат маҳсулотларини сақлаш шароитларига эътибор бериш, савдо дўконларидан консерваларни харид қилишда унинг муддати, идишларнинг бутунлиги, қопқоқлари шишмаганлиги ва хавфсизлигини кафолатловчи ҳужжатларига эътибор бериш, таом тайёрлашда тозаликка ва шахсий гигиена қоидаларига тўлиқ риоя этиш лозим.