Uy sharoitida tayyorlangan konservalarni isteʼmol qilsa boʻladimi?

Sanitariya–epidemiologiya qoʻmitasi boʻlim boshligʻi Anvar Shukurovga koʻra, uy sharoitida tayyorlangan konserva mahsulotlari inson salomatligiga xavf soladi. Chunki ushbu mahsulotlar isteʼmoli ortidan odamlarda botulizm kasalligi yuzaga kelmoqda. 

"Botulizm esa oziq-ovqat mahsulotlaridan zaharlanishlar ichida eng ogʻir kechadigan xastaliklardan biri. Bu xastalik koʻp hollarda uy sharoitida sanitariya qoida va meʼyorlariga rioya qilinmay tayyorlangan sabzavotli, asosan, bodring, pomidor, baqlajon va qoʻziqorin konservalarini isteʼmol qilish oqibatida kelib chiqmoqda", deydi u.

Botulizm qanday kasallik, uning oqibati nimalarga olib keladi? 

Botulizm virusi tashqi muhitga oʻta chidamli boʻlib, 100 darajada 6 soat, 120 darajada esa 10 daqiqagacha tirik boʻladi. Oʻzida zararli moddani saqlovchi konserva mahsulotlarini isteʼmol qilish sababli turli salbiy oqibatlar, hatto, oʻz vaqtida tibbiy yordam koʻrsatilmaganda oʻlimga olib keluvchi eng ogʻir turdagi zaharlanishdan kelib chiqadi. 

Xastalikning yashirin davri 2-4 soatdan 14 kungacha davom etishi mumkin. Botulizm mikrobining toksini asosan markaziy asab tizimiga taʼsir etadi va organizmda turli oʻzgarishlarga olib keladi. 

Botulizm alomatlari qanday yuzaga chiqadi? 

Botulizmga chalingan bemorlarning nafas olishi qiyinlashishi, ogʻiz-tomoqning qurishi, jismlar koʻzga ikkita boʻlib koʻrinishi (diplopiya), koʻz qovoqlari osilib qolishi (ptoz), yutinish qiyinlashishi hamda umumiy holsizlanish, koʻngil aynishi va qusish (koʻpincha takrorlanadi), qorin sohasidagi ogʻriq kabi belgilar namoyon boʻladi. Bundan tashqari, bemorning soʻzlari tushunarsiz boʻlib qoladi, boʻyin va oyoq mushaklarining zaiflashishi natijasida yurishga qiynaladi. 

Botulizmni oldini olish uchun nima qilish kerak? 

Anvar Shukurovga koʻra, mazkur kasallikni oldini olish uchun uy sharoitida konservalarni tayyorlamaslik kerak. Bozor va aholi gavjum joylarda fuqarolar tomonidan sotilayotgan, nomaʼlum sharoitda tayyorlangan, sifati kafolatlanmagan konservalarni xarid qilmaslik lozim. 

Shuningdek, banka qopqogʻi koʻtarilgan (bombaj), shuningdek, rangida oʻzgarish boʻlgan konservalarni isteʼmol qilmaslik, oziq-ovqat mahsulotlarini saqlash sharoitlariga eʼtibor berish, savdo doʻkonlaridan konservalarni xarid qilishda uning muddati, idishlarning butunligi, qopqoqlari shishmaganligi va xavfsizligini kafolatlovchi hujjatlariga eʼtibor berish, taom tayyorlashda tozalikka va shaxsiy gigiyena qoidalariga toʻliq rioya etish lozim.