Ўзбекистонда қарздорларнинг 61 фоизи кредитни ўз вақтида тўлолмаяпти — МБ

Иштирокчиларнинг 77 фоизи ўзи ёки оила аъзоларидан бирида банк ва банкдан ташқари қарз мажбуриятлари борлигини қайд этган. Шу билан бирга, респондентларнинг 68 фоизи банкдан қарз мажбуриятига эга бўлиб, уларнинг ҳар бешдан бирида банкдан ташқари қарз мажбуриятлари ҳам мавжуд.

Энг ташвишли жиҳати — қарз мажбуриятига эга респондентларнинг 61 фоизи уни ўз вақтида тўлаш қийинлигини айтган.

Қарз маблағларининг асосий қисми:

20 фоизи — уй-жой сотиб олиш ёки таъмирлаш;
18 фоизи — автомобиль хариди;
8 фоизи — мавжуд қарзни сўндириш учун жалб қилинган.

Сўров натижаларига кўра, респондентларнинг 68 фоизида барча қарз мажбуриятлари бўйича ойлик тўлов миқдори 6 млн сўмдан кам. Респондентларнинг 48 фоизида қарз мажбуриятлари бўйича тўлов муддати 3 йилдан кам қолган, 27 фоизида эса — 5 йил ва ундан ортиқ.

Шу билан бирга, иштирокчиларнинг бир қисми кейинги олти ойда молиявий аҳволи яхшиланишига умид билдирган бўлса, айримлари янги кредит олиш эҳтиёжи ҳам сақланиб қолаётганини айтган.

Жами респондентларнинг 15 фоизи кейинги 6 ой давомида қўшимча қарз олиш эҳтиёжи борлигини билдирган — уларнинг чорак қисми бу маблағни уй-жой сотиб олиш ёки таъмирлашга йўналтиришни режалаштирган.