O‘zbekistonda qarzdorlarning 61 foizi kreditni o‘z vaqtida to‘lolmayapti — MB

Ishtirokchilarning 77 foizi o‘zi yoki oila a’zolaridan birida bank va bankdan tashqari qarz majburiyatlari borligini qayd etgan. Shu bilan birga, respondentlarning 68 foizi bankdan qarz majburiyatiga ega bo‘lib, ularning har beshdan birida bankdan tashqari qarz majburiyatlari ham mavjud.

Eng tashvishli jihati — qarz majburiyatiga ega respondentlarning 61 foizi uni o‘z vaqtida to‘lash qiyinligini aytgan.

Qarz mablag‘larining asosiy qismi:

20 foizi — uy-joy sotib olish yoki ta’mirlash;
18 foizi — avtomobil xaridi;
8 foizi — mavjud qarzni so‘ndirish uchun jalb qilingan.

So‘rov natijalariga ko‘ra, respondentlarning 68 foizida barcha qarz majburiyatlari bo‘yicha oylik to‘lov miqdori 6 mln so‘mdan kam. Respondentlarning 48 foizida qarz majburiyatlari bo‘yicha to‘lov muddati 3 yildan kam qolgan, 27 foizida esa — 5 yil va undan ortiq.

Shu bilan birga, ishtirokchilarning bir qismi keyingi olti oyda moliyaviy ahvoli yaxshilanishiga umid bildirgan bo‘lsa, ayrimlari yangi kredit olish ehtiyoji ham saqlanib qolayotganini aytgan.

Jami respondentlarning 15 foizi keyingi 6 oy davomida qo‘shimcha qarz olish ehtiyoji borligini bildirgan — ularning chorak qismi bu mablag‘ni uy-joy sotib olish yoki ta’mirlashga yo‘naltirishni rejalashtirgan.