Пенсия тизимида қандай ўзгаришлар кутилмоқда?

Таклифларга кўра, иш ҳақининг 5 фоизини ихтиёрий равишда пенсия жамғармасига йўналтирган ходимларга давлат ушбу маблағнинг яна 50 фоизини қўшиб беради.

Масалан, ойлиги 7 миллион сўм бўлган ходим амалдаги тизимда 20 йилда тахминан 5 миллион сўм жамғарса, янги механизм жорий этилса, бу маблағ 126 миллион сўмгача етиши мумкин.

Шунингдек, пенсия ҳисоблашдаги энг юқори иш ҳақи чегарасини ошириш таклиф этилмоқда. Ҳозирги тартибга кўра, пенсия ҳисоблашда 6 миллион сўмлик ойлик чегараси қўлланилади. Шу сабабли юқори маош олувчилар ҳам белгиланган максимал миқдордан ортиқ пенсия ололмайди.

Яна бир таклифга кўра, пенсия миқдори меҳнат фаолиятининг 20 йиллик давридаги иш ҳақи асосида ҳисобланиши режалаштирилган.

Бундан ташқари, «Менинг пенсиям» мобил иловасини ишга тушириш кўзда тутилган. У орқали фуқаролар меҳнат стажи, иш ҳақи, тўланган ижтимоий тўловлар ва жамғарилган пенсия маблағларини реал вақт режимида кузатиб бориши мумкин бўлади.

Эслатма: мазкур ўзгаришлар Пенсия жамғармаси томонидан маълум қилинган таклифлар бўлиб, уларни амалга ошириш учун тегишли норматив-ҳуқуқий ҳужжатлар қабул қилиниши талаб этилади.