Энди I ва II гуруҳ ногиронлик пенсияси проактив қайта ҳисобланади

Сенат ялпи мажлисида “Фуқароларнинг давлат пенсия таъминоти тўғрисида”ги Ўзбекистон Республикаси қонунига пенсия тайинлаш тартибини янада такомиллаштиришга қаратилган ўзгартиришлар ва қўшимча киритиш ҳақида”ги қонун муҳокама қилинди.

Мазкур масала бўйича маъруза қилган Сенатнинг Фан, таълим ва соғлиқни сақлаш масалалари қўмитаси раиси Одилжон Маматкаримов пенсия тайинлаш тартибини соддалаштириш, соҳани рақамлаштириш орқали ортиқча бюрократик тўсиқларни бартараф этишга эътибор қаратилаётганини айтди.

Қонунга кўра, фуқарога I ёки II гуруҳ ногиронлиги белгиланса, унга ногиронлик пенсияси фуқаронинг алоҳида мурожаатисиз, проактив равишда тайинланади.

Агар фуқаро пенсия тайинланганидан кейин камида бир йил ишласа, унинг ногиронлик пенсияси ҳар икки йилда бир марта фуқаронинг аризаси талаб қилинмасдан, проактив равишда қайта ҳисоблаб чиқилади.

Шунингдек, Пенсиядан чегирма қилинганидан сўнг фуқарога тўланадиган пенсия миқдори энг кам истеъмол харажатлари миқдоридан кам бўлмаслиги белгиланмоқда.