Пенсия тизимида янги тартиб: қоғоз шаклида ҳужжат тақдим этиш бекор қилинади

Президент қарори билан пенсия таъминоти тизимини рақамлаштириш ва хизматларни проактив шаклга ўтказиш бўйича янги тартиблар белгиланди.

Унга кўра, 2026 йил 1 ноябрдан корхона тугатилиши ёки штат қисқариши сабаб ишсиз деб эътироф этилган шахсларга муддатидан олдин ёшга доир пенсия алоҳида мурожаатсиз тайинланади.

2027 йил 1 январдан боқувчисини йўқотганлик пенсиясини ҳам проактив тарзда тайинлаш йўлга қўйилади.

Шунингдек, 2027 йилдан Пенсия жамғармасига қоғоз шаклида ҳужжат ва маълумот тақдим этиш амалиёти бекор қилинади.

Фуқаролар учун «Менинг пенсиям» онлайн хизмати ишга туширилиб, унда иш стажи, олий таълимда ўқиган ва ҳарбий хизмат даври ҳақидаги маълумотлар ҳамда бўлажак пенсиянинг тахминий миқдорини кўриш имконияти яратилади.

Пенсия ёшига бир йил қолган фуқаролар бу ҳақда олдиндан хабардор қилинади. Пенсияни нақд пул шаклига ўтказиш, тўхтатилган пенсия тўловини тиклаш ва пенсиядан ушлаб қолинаётган маблағлар ҳақида маълумот олиш каби хизматлар ҳам онлайн шаклга ўтказилади.

Бундан ташқари, 2026 йил 1 октябрдан фуқаролик-ҳуқуқий шартнома асосида ишловчиларга ижтимоий солиқ тўлаш орқали ушбу даврни иш стажига қўшиш имконияти берилади.

2027 йил 1 январдан расмий даромадга эга шахслар ишламайдиган оила аъзолари учун ихтиёрий равишда ижтимоий солиқ тўлаши мумкин. Бунда ҳар бир оила аъзоси учун тўлов миқдори меҳнатга ҳақ тўлаш энг кам миқдорининг 12 фоизини ташкил этади.

Қарорда пенсия таъминоти бўйича хизматларни 2027 йил 1 январга қадар тўлиқ интерактив ва проактив шаклга ўтказиш вазифаси белгиланган.