Тошкентда JAC Motors автомобиль заводи ишга туширилди

 “Янги Авлод” махсус саноат зонасида “JAC Motors Тoshkent” заводининг тантанали очилиш маросими бўлиб ўтди.

Тадбир доирасида Ўзбекистонда ишлаб чиқарилиши бошланган бренднинг илк модели — JAC М3 автомобилини йиғиш линияси расман ишга туширилди.

“JAC Motors Тoshkent” МЧЖ – Хитойнинг JAC Motors (51%)  компанияси ҳамда “Тошкент инвест компанияси” (49%)  АЖ ҳамкорлигида қўшма корхона шаклида ташкил этилди.

Завод ички ёнув двигателли, гибрид ва электромобиллар ишлаб чиқариш лойиҳасидир.

Лойиҳа қиймати 135 млн АҚШ доллари бўлиб, умумий 30 гектар майдонда икки босқичда амалга оширилади.

Биринчи босқичда 35 млн АҚШ доллари миқдорида инвестиция ўзлаштирилиб, йиллик 10 минг дона автомобиль ишлаб чиқариш қувватига эга завод ишга туширилди ҳамда 100 та янги иш ўрни яратилди.

Иккинчи босқичда эса тўлиқ ишлаб чиқариш циклига эга заводни барпо этиш, йиллик қувватни 30 минг дона автомобилга етказиш ва қарийб 1000 та қўшимча иш ўрни яратиш кўзда тутилган.

Келгусида Тошкентда JAC М4, Sunray, JS8, РФ8, Т8 ва Т9 моделларини ишлаб чиқариш режалаштирилмоқда.

Аввалроқ Бухорода “Leapmotor” автомобиллари ишлаб чиқарилиши ҳақида хабар бергандик.