Toshkentda JAC Motors avtomobil zavodi ishga tushirildi

“Yangi Avlod” maxsus sanoat zonasida “JAC Motors Toshkent” zavodining tantanali ochilish marosimi bo‘lib o‘tdi.

Tadbir doirasida O‘zbekistonda ishlab chiqarilishi boshlangan brendning ilk modeli — JAC M3 avtomobilini yig‘ish liniyasi rasman ishga tushirildi.

“JAC Motors Toshkent” MChJ – Xitoyning JAC Motors (51%)  kompaniyasi hamda “Toshkent invest kompaniyasi” (49%)  AJ hamkorligida qo‘shma korxona shaklida tashkil etildi.

Zavod ichki yonuv dvigatelli, gibrid va elektromobillar ishlab chiqarish loyihasidir.

Loyiha qiymati 135 mln AQSh dollari bo‘lib, umumiy 30 gektar maydonda ikki bosqichda amalga oshiriladi.

Birinchi bosqichda 35 mln AQSH dollari miqdorida investitsiya o‘zlashtirilib, yillik 10 ming dona avtomobil ishlab chiqarish quvvatiga ega zavod ishga tushirildi hamda 100 ta yangi ish o‘rni yaratildi.

Ikkinchi bosqichda esa to‘liq ishlab chiqarish sikliga ega zavodni barpo etish, yillik quvvatni 30 ming dona avtomobilga yetkazish va qariyb 1000 ta qo‘shimcha ish o‘rni yaratish ko‘zda tutilgan.

Kelgusida Toshkentda JAC M4, Sunray, JS8, RF8, T8 va T9 modellarini ishlab chiqarish rejalashtirilmoqda.

Avvalroq Buxoroda “Leapmotor” avtomobillari ishlab chiqarilishi haqida xabar bergandik.