Электромобилларнинг «умри» қисқами?

Маълумотларга кўра, 2025 йил давомида Хитой бозорида 230 дан ортиқ янги электромобил модели тақдим этилган. 2026 йилнинг фақат март ойида эса қарийб 80 та тақдимот ўтказилиб, 60 дан ортиқ янги модел савдога чиқарилган.

Бугунги кунда ташқи дизайнни ярим йилда бир марта, янги авлод моделини эса бир йилда бир марта чиқариш автомобиль саноатида оддий ҳолга айланган.

Бу жараён электромобилларнинг қайта сотиш қийматига ҳам таъсир қилмоқда. Уч-тўрт йил аввал ишлаб чиқарилган кўплаб электромобиллар янги дастурий таъминотни қўллаб-қувватлай олмайди. Шу боис улар иккиламчи бозорда тезроқ қадрсизланади.

Хитой автомобил савдо ассоциацияси маълумотларига кўра, дастлабки авлод электромобилларининг уч йиллик қолдиқ қиймати айрим ҳолларда 40 фоиздан ҳам пастга тушган. Ичдан ёнув двигателли автомобилларда эса бу кўрсаткич ўртача 60 фоиз атрофида сақланиб қолади.

Электромобил эгалари ўртача 3–5 йилда автомобилини янгилашга ҳаракат қилади. Бунинг асосий сабаби автомобиль сифати эмас, балки электромобиллар дастурий ва техник жиҳатдан тезроқ эскирадиган рақамли қурилмага айланиб бораётганидир.

Мафтуна Бахтиёрова