Туркий давлатлар иқтисодиёти 673,6 миллиард долларга етди

Иқтисодий ислоҳотлар ва коммуникацияларни таҳлил қилиш маркази Туркий давлатлар ташкилоти котибияти билан биргаликда жорий йилнинг биринчи чораги учун "Турк иқтисодий шарҳи" ҳисоботини нашр этди.  Бу ҳақда UzA хабар берди.

Ҳужжатда ташкилотнинг иштирокчи мамлакатлари ва кузатувчиларининг иқтисодий кўрсаткичлари таҳлили келтирилган. 

Ялпи ички маҳсулот ва аҳоли сони

Ҳисобот даврида туркий давлатларнинг умумий ялпи ички маҳсулоти 673 миллиард 557,5 миллион долларга етди. Бу глобал иқтисодиётнинг 2,34 фоизидир. 

Минтақанинг умумий аҳолиси эса 178,8 миллион кишини кишини ташкил этган. Бу дунё аҳолисининг 2,8 фоизига тенг. 

Савдо айланмаси 

Биринчи чоракда туркий давлатларнинг умумий савдо айланмаси 326 миллиард 11,55 миллион долларга етди, бу жаҳон савдо айланмасининг тахминан 3,73 фоизини ташкил этади. 

Мамлакатлар бўйича иқтисодий ўсиш суръатлари қуйидагича: 

• Қирғизистонда 10,1 фоиз;
• Ўзбекистонда 8,7 фоиз;
• Туркманистонда 8,5 фоиз;
• Шимолий Кипрда (Шимолий Кипр Турк Республикаси) 6,3 фоиз;
• Қозоғистонда 3,0 фоиз;
• Туркияда (ташкилотнинг энг йирик иқтисодиёти) 2,5 фоиз;
• Венгрияда 1,7 фоиз;
• Озарбайжонда 0,3 фоиз.

Савдо айланмаси бўйича Туркия 155 миллиард 122 миллион доллар кўрсаткич билан ташкилотнинг мутлақ етакчиси бўлди. 

Ундан кейинг ўринларда:

• Венгрия 87 миллиард 445 миллион доллар;
• Қозоғистон 32 миллиард 908 миллион доллар;
• Ўзбекистон 18 миллиард 23 миллион доллар кўрсаткич қайд этди. 

Саноат соҳаси

Саноат соҳасида энг юқори ўсиш суръатлари йирик ишлаб чиқариш ва инфратузилма лойиҳалари ҳисобига Қирғизистонда 14 фоизни, Шимолий Кипрда 9,2 фоизни, Ўзбекистонда 8 фоизни, Туркманистонда 2,4 фоизни ва Туркияда 1,1 фоизни ташкил этди. 

Қишлоқ хўжалиги соҳасида эса энг юқори ўсиш суръати Шимолий Кипрда қайд этилиб, 7,9 фоизни ташкил қилди. 

Ўзбекистонда қишлоқ хўжалиги ўсиши 5,1 фоиз, Қозоғистонда 3,4 фоиз, Қирғизистонда 2,8 фоиз ва Туркияда 2,7 фоиз бўлди.