Исроил Ғазо секторига ҳужумларни тўхтатгани айтилмоқда

Исроил Ғазо секторига ҳужумни тўхтатди — Иерусалим Фаластин билан тинчлик келишуви бўйича Трамп режасини амалга оширишга киришди, хабар бермоқда “Онадўли” ахборот агентлиги.

Тунда ҲАМАС мулоқотга тайёр эканини билдириб, барча гаровдагиларни озод қилишга, ҳалок бўлганларнинг жасадларини топширишга ва Ғазони технократлар ҳукумати бошқаришига рози бўлишини маълум қилди.

Эрталабнинг ўзидаёқ Трамп ҲАМАСнинг тинчлик йўли ҳақидаги баёнотига ижобий муносабат билдирди ва Исроилни бомбардимонларни тўхтатишга чақирди. Аммо ультиматум кучда қолмоқда: 5 октябрга қадар ҳаракат шартномани имзолаши керак, акс ҳолда, Трампнинг сўзларига кўра, "уларнинг бошига ҳеч ким илгари кўрмаган даражадаги дўзах азоби ёғилади".

Исроил бош вазири Биньямин Нетаняху ҳам Дональднинг сўзларидан сўнг ЦАҲАЛ Ғазога ўт очишни тўхтатганини ва Иерусалим тинчлик келишуви режасининг иккинчи босқичига киришганини билдирди.

Айни пайтда, Исроил нашрларининг  таъкидлашича, Исроил армиясига Ғазога ҳужумларнинг шиддатини камайтириш бўйича кўрсатма берилган ва яқин вақт ичида музокаралар бошланиши кутилмоқда.

Эслатиб ўтамиз, 2023 йил октябридан бери Исроил армияси шиддатли ҳужумлар ва қаттиқ қамал олиб бораётган Ғазода 66 мингдан ортиқ фаластинлик ҳалок бўлди.