Исроил Ғазода мажбурий эвакуацияни бошлади

Бани Суҳайла шаҳридаги Ал-Рақиб маҳалласида тахминан 70 оила тарқатилган варақалар орқали зудлик билан ҳудудни тарк этишга чақирилди.

ҲАМАС расмийлари ушбу эвакуацияни тинч аҳолига нисбатан босим сифатида баҳоламоқда. Маҳаллий манбаларга кўра, кўчириш чоралари камида 3 минг кишининг уй-жойини тарк этишига сабаб бўлиб, аллақачон оғир бўлган гуманитар вазиятни янада кескинлаштирган.

Маълум қилинишича, сулҳ шартларига биноан жанг ҳаракатлари тўхтатилган, Исроил Ғазо ҳудудининг фақат бир қисмини тарк этган, ҲАМАС эса маҳбусларни қайтарган. Бироқ томонлар битимнинг кейинги босқичлари бўйича ҳалигача келишувга эриша олмаяпти.

Айни пайтда Ғазода 2 миллиондан ортиқ аҳоли ҳудуднинг учдан бир қисмида яшамоқда. Кўплаб одамлар вақтинча қўналғаларда ёки шикастланган биноларда кун кечиришга мажбур.

АҚШ таклиф этган режага кўра, ҲАМАС қуролларни топшириши, Исроил эса ҳудудни тўлиқ тарк этиши, халқаро ёрдам орқали эса Ғазо тикланиши лозим. Аммо ҳозирча бу режа амалга ошмаган, аҳоли эса озиқ-овқат ва бошпана танқислиги шароитида яшамоқда.

Маҳаллий манбалар эвакуация қилинган оилаларнинг яшаш шароити янада ёмонлашганини, улар жиддий ижтимоий ва гуманитар қийинчиликларга дуч келаётганини таъкидламоқда.