Исроил ОАВ: АҚШ ва ҲАМАС ўртасида музокаралар қайта тикланди

Исроил оммавий ахборот воситалари хабарига кўра, бир ҳафталик танаффусдан сўнг АҚШ ва ҲАМАС ўртасида музокаралар яна давом этмоқда.

Israel Hayom нашри ёзишича, Америка ва араб манбалари музокаралар қайта бошланганини тасдиқлаган, аммо Вашингтон Исроилнинг Ғазога ҳужум операцияларини тўхтатиш ниятида эмас.

Маълумотларга кўра, Миср ва Қатар воситачилигида олиб борилган уринишлар натижа бермаганидан кейин музокаралар қайта йўлга қўйилган. АҚШнинг позициясига кўра, уруш фақат барча гаровдагилар озод қилинган тақдирдагина тўхташи мумкин. Шу сабабдан Вашингтон Исроил билан тўғридан-тўғри музокара жараёнини тезлаштириш зарурлигини таъкидламоқда.

АҚШ президенти Доналд Трамп ҳам ўтган куни чиқишида Вашингтоннинг ҲАМАС билан асирлар алмашинуви бўйича фаол мулоқот олиб бораётганини айтди. Унинг сўзларига кўра:

«Биз ҲАМАС билан жуда шиддатли музокаралар ўтказяпмиз. Биз уларга: “ҳамма асирларни дарҳол озод қилинг — шунда барчаси анча яхшироқ бўлади. Агар озод қилмасангиз, оқибати жуда ёмон бўлади”, деб айтдик».

Трамп, шунингдек, ҲАМАС қўлида бўлиши мумкин бўлган 20 нафар шахсни озод қилиш имконияти муҳокама қилинаётганини, яна 30 нафар асир эса катта эҳтимол билан ҳалок бўлганини қўшимча қилди.