Албания суди 19 нафар намойишчини озод қилди

Албания пойтахти Тирана суди 19 нафар намойишчини озодликка чиқарди. Улар АҚШ президенти Доналд Трамп оиласига алоқадор бўлган дам олиш масканига қарши ўтказилган зўравонли намойишда ҳибсга олинган.

5 июль куни озод этилган намойишчилар полиция буйруқларига бўйсунмаслик, ноқонуний намойишлар уюштириш ва жамоат тартибини бузишда гумон қилиниб ушлаб турилган.

Улардан 2 нафари уй қамоғига олинди, 12 нафари эса ойига бир-икки марта суд полициясига ҳисобот бериб туриши керак. Қолган 5 нафарига ҳеч қандай айблов эълон қилинмади.

Суд биноси олдида тўпланиб, “Йигитларни озод қилинг!” дея ҳайқираётган ўнлаб тарафдорлар бу хабарни олқишлар билан кутиб олди.

Трамп оиласига алоқадор курорт

Албанияда май ойидан бери тунги намойишлар авжида. Бунга дастлаб, муҳофаза этиладиган табиий ҳудудда Трампнинг куёви Жаред Кушнерга алоқадор ҳашаматли қирғоқбўйи курорти лойиҳаси сабаб бўлган.

Ўшандан кейин митинглар ҳукумат ва коррупцияга қарши кенг кўламли норозилик намойишларига айланиб кетди. Намойишчилар бош вазирга ишора қилиб, “Янги Албания” ва “Эди Рама, истеъфога чиқ” дея ҳайқирмоқда.

Ўтган пайшанба куни юзлаб намойишчилар  сиёсатчилар билан юзма-юз келиш ва кириш йўлини тўсиш учун парламент биноси олдида йиғилди. Полиция уларни тарқатиб юбориш учун кўздан ёш оқизувчи газ, қалампир гази ва сув пуркагичлардан фойдаланди.

Айрим намойишчилар полиция сафларини ёриб ўтишга уриниб, тухум, тош ва бошқа буюмларни отган.

15 нафар полиция ходими жароҳатланиб, 25 нафар намойишчи қўлга олинди.

Асосий талаб - ҳукумат истеъфоси

Режалаштирилган курорт лойиҳаси илк бор 2024 йилда тақдим этилган. Бироқ май ойи охирида соҳилбўйида тиканли симлар ва булдозерлар пайдо бўлиши ортидан норозиликлар бошланди.

Лойиҳага қаршилик коррупция билан боғлиқ норозиликлар учун турткига айланди. Эндиликда Бош вазир Эди Раманинг истеъфоси ҳам талаблар қаторига киритилган.

Жорий йил бошида намойишчилар Рама ўринбосари Белинда Баллукуни коррупцияда айблаб, истеъфога чиқишини талаб қилишган. Баллуку лавозимидан бўшатилса-да, ишончсизлик сақланиб қолмоқда.