Albaniya sudi 19 nafar namoyishchini ozod qildi

Albaniya poytaxti Tirana sudi 19 nafar namoyishchini ozodlikka chiqardi. Ular AQSh prezidenti Donald Tramp oilasiga aloqador bo‘lgan dam olish maskaniga qarshi o‘tkazilgan zo‘ravonli namoyishda hibsga olingan.

5-iyul kuni ozod etilgan namoyishchilar politsiya buyruqlariga bo‘ysunmaslik, noqonuniy namoyishlar uyushtirish va jamoat tartibini buzishda gumon qilinib ushlab turilgan.

Ulardan ikki nafari uy qamog‘iga olindi, 12 nafari esa oyiga bir-ikki marta sud politsiyasiga hisobot berib turishi kerak. Qolgan besh nafariga hech qanday ayblov e’lon qilinmadi.

Sud binosi oldida to‘planib, “Yigitlarni ozod qiling!” deya hayqirayotgan o‘nlab tarafdorlar bu xabarni olqishlar bilan kutib oldi.

Tramp oilasiga aloqador kurort

Albaniyada may oyidan beri tungi namoyishlar avjida. Bunga dastlab, muhofaza etiladigan tabiiy hududda Trampning kuyovi Jared Kushnerga aloqador hashamatli qirg‘oqbo‘yi kurorti loyihasi sabab bo‘lgan.

O‘shandan keyin mitinglar hukumat va korrupsiyaga qarshi keng ko‘lamli norozilik namoyishlariga aylanib ketdi. Namoyishchilar bosh vazirga ishora qilib, “Yangi Albaniya” va “Edi Rama, iste’foga chiq” deya hayqirmoqda.

O‘tgan payshanba kuni yuzlab namoyishchilar  siyosatchilar bilan yuzma-yuz kelish va kirish yo‘lini to‘sish uchun parlament binosi oldida yig‘ildi. Politsiya ularni tarqatib yuborish uchun ko‘zdan yosh oqizuvchi gaz, qalampir gazi va suv purkagichlardan foydalandi.

Ayrim namoyishchilar politsiya saflarini yorib o‘tishga urinib, tuxum, tosh va boshqa buyumlarni otgan.

15 nafar politsiya xodimi jarohatlanib, 25 nafar namoyishchi qo‘lga olindi.

Asosiy talab - hukumat iste’fosi.

Rejalashtirilgan kurort loyihasi ilk bor 2024-yilda taqdim etilgan. Biroq may oyi oxirida sohilbo‘yida tikanli simlar va buldozerlar paydo bo‘lishi ortidan noroziliklar boshlandi.

Loyihaga qarshilik korrupsiya bilan bog‘liq noroziliklar uchun turtkiga aylandi. Endilikda Bosh vazir Edi Ramaning iste’fosi ham talablar qatoriga kiritilgan.

Joriy yil boshida namoyishchilar Rama o‘rinbosari Belinda Ballukuni korrupsiyada ayblab, iste’foga chiqishini talab qilishgan. Balluku lavozimidan bo‘shatilsa-da, ishonchsizlik saqlanib qolmoqda.