АҚШ Ироқдаги 23 йиллик ҳарбий иштирокини якунлади

АҚШ ва коалиция ҳамкорлари Ироқда 2014 йилдан буён давом этган «Қатъий ирода» (Operation Inherent Resolve) ҳарбий операциясини расман якунлади. Пентагон маълум қилишича, коалиция кучлари ва техникаларининг Эрбил авиабазасидан тартибли чиқарилиши миссиянинг тугалланганини англатади.

Операция Ироқда «Исломий давлат» (ИШИД) террорчилик ташкилотига қарши курашиш мақсадида 2014 йилда бошланган. Пентагон вакили Шон Парнеллнинг айтишича, операция натижасида ИШИД Ироқда уюшган ҳарбий куч сифатида мағлуб этилган.

АҚШ қўшинлари Ироқда 2003 йилдан бери бўлиб келган. 2007 йилда мамлакатдаги Америка ҳарбийлари сони 170 мингдан ошган. 2011 йилда контингент деярли тўлиқ олиб чиқилган бўлса, 2014 йилда ИШИДга қарши операция бошланиши билан АҚШ ҳарбийлари яна Ироққа қайтарилган.

2021 йилга келиб ИШИД Ироқда эгаллаб турган ҳудудлари устидан назоратини йўқотган. Ўша пайтда мамлакатда тахминан 2,5 минг нафар АҚШ ҳарбий хизматчиси қолган эди.

2024 йил сентябрда АҚШ ва Ироқ ҳарбий миссияни босқичма-босқич якунлаш бўйича келишувга эришган. Энди Ироқда хавфсизликни таъминлашда асосий масъулият мамлакат хавфсизлик кучлари зиммасига ўтади. АҚШ эса кадрлар тайёрлаш ва разведка маълумотлари билан ёрдам беришда давом этишини билдирган.