АҚШда мусулмон эркак дини туфайли пичоқланди

Ҳодиса 13 июль куни Юта штатининг Уэст Велли Сити шаҳридаги "Valley Fair" савдо марказида содир бўлган. 

Жабрланувчи танасининг турли қисмларига кўп маротаба пичоқ урилган. Натижада кўп қон йўқотган.

Воқеа жойига полиция етиб келгунига қадар атрофдагилар 48 ёшли жиноятчи – Питер Майкл Ларсенни ерга йиқитиб ушлаб турган.

Жабрланувчи савдо марказидаги киоскда ишловчи мусулмон эркак бўлган.

Полиция ҳужжатларида қайд этилишича, айбдор жабрланувчини “мусулмон бўлгани учун ўлдиришга уринганини” тан олган.

Юта Ислом маркази имоми Шуаиб Диннинг жабрланувчи оиласидан олган маълумотларига кўра, жиноятчи аввал мусулмон эркакдан исми ва динини сўраган, сўнгра бир шиша сув беришни талаб қилган.

Мусулмон киши сув олиш учун ўгирилган пайтда ҳужумчи унга пичоқ билан ташланган.

Жабрланувчи оғир аҳволда шифохонага ётқизилган. Унинг дўсти GoFundMe платформасида хайрия саҳифасини очди. Унда қайд этилишича, беморга бир неча жарроҳлик амалиёти зарур.

Ортиб бораётган исломофобия

АҚШда исломофобия сўнгги йигирма йилдан ортиқ вақт давомида, хусусан 2001 йил 11 сентябрь терактларидан кейин кучайган.

Сўнгги йилларда эса иммиграцияга қарши сиёсат, оқ танлилар устунлигини тарғиб қилувчи экстремистик қарашлар ва Исроилнинг Ғазодаги уруши туфайли бу кайфият янада авж олди.