AQSHda musulmon erkak dini tufayli pichoqlandi

Hodisa 13-iyul kuni Yuta shtatining Uest Velli Siti shahridagi "Valley Fair" savdo markazida sodir bo‘lgan. 

Jabrlanuvchi tanasining turli qismlariga ko‘p marotaba pichoq urilgan. Natijada ko‘p qon yo‘qotgan.

Voqea joyiga politsiya yetib kelguniga qadar atrofdagilar 48 yoshli jinoyatchi – Piter Maykl Larsenni yerga yiqitib ushlab turgan.

Jabrlanuvchi savdo markazidagi kioskda ishlovchi musulmon erkak bo‘lgan.

Politsiya hujjatlarida qayd etilishicha, aybdor jabrlanuvchini “musulmon bo‘lgani uchun o‘ldirishga uringanini” tan olgan.

Yuta Islom markazi imomi Shuaib Dinning jabrlanuvchi oilasidan olgan ma’lumotlariga ko‘ra, jinoyatchi avval musulmon erkakdan ismi va dinini so‘ragan, so‘ngra bir shisha suv berishni talab qilgan.

Musulmon kishi suv olish uchun o‘girilgan paytda hujumchi unga pichoq bilan tashlangan.

Jabrlanuvchi og‘ir ahvolda shifoxonaga yotqizilgan. Uning do‘sti GoFundMe platformasida xayriya sahifasini ochdi. Unda qayd etilishicha, bemorga bir necha jarrohlik amaliyoti zarur.

Ortib borayotgan islomofobiya

AQSHda islomofobiya so‘nggi yigirma yildan ortiq vaqt davomida, xususan 2001-yil 11-sentyabr teraktlaridan keyin kuchaygan.

So‘nggi yillarda esa immigratsiyaga qarshi siyosat, oq tanlilar ustunligini targ‘ib qiluvchi ekstremistik qarashlar va Isroilning G‘azodagi urushi tufayli bu kayfiyat yanada avj oldi.