Эрдўған: “Туркия самарали ташқи сиёсат орқали дунёдаги мавқеини мустаҳкамламоқда”

Туркия самарали ташқи сиёсат туфайли, минтақада ҳам, дунёда ҳам таъсирли давлатга айланиш сари ишонч билан қадам ташламоқда.

Бу ҳақда Туркия президенти Ражаб Тоййиб Эрдўған Лозанна тинчлик шартномаси имзоланганининг 102 йиллиги муносабати билан қилган баёнотида маълум қилди. Президент маъмурияти ҳузуридаги Алоқалар бошқармаси давлат раҳбарининг мурожаатини эълон қилди.

Президент Эрдўғаннинг таъкидлашича, Лозанна шартномаси турк халқининг мустақилликка интилишини ва бу йўлдаги курашини халқаро ҳуқуқ нормалари доирасида тасдиқлаган ва мустаҳкамлаган.

“Лозанна шартномаси имзоланганига 102 йил тўлди. Мамлакатимиз ривожланиш ва фаровонлик сари ишонч билан бормоқда. Тинчлик, ҳамкорлик ва ўзаро ҳурматга асосланган ташқи сиёсат юритар эканмиз, минтақа ва дунёда таъсирли давлатга айланмоқдамиз. Бугун биз кечагидан яхшироқ ҳолатдамиз. Худо хоҳласа, эртага янада юқори босқичга етамиз,” — деди Эрдўған.