Эрдўғон ва диний қадриятлар ҳақидаги ҳазили учун туркиялик комик судланди

Туркияда 3 июль куни ҳибсга олинган комик Дениз Кўктош 88 кундан сўнг биринчи марта суд олдида ҳозир бўлди. Унга президентни ҳақорат қилиш ҳамда диний қадриятларни очиқчасига ҳақорат қилиш билан боғлиқ айбловлар қўйилган. Бу ҳақда "Sözcü" нашри хабар берди.

Маълум қилинишича, Кўктош аҳолисининг асосий қисми мусулмон бўлган Туркияда халқнинг эътиқоди, муқаддас байрамлари ва урф-одатларини ҳазил остига олган.

Унга Туркия Жиноят кодексининг 299-моддаси бўйича «президентни ҳақорат қилиш», шунингдек, 216-модданинг 3-қисми асосида «аҳолининг бир қисми эътиқод қиладиган диний қадриятларни очиқчасига ҳақорат қилиш» айблари қўйилган.

Прокуратура Дениз Кўктошга нисбатан 12 йилгача озодликдан маҳрум қилиш жазосини сўраган.

Кўктош 28 август куни озод қилингани, бироқ кейинчалик яна ҳибсга олингани хабар қилинган. У Каратапе юқори хавфсизликдаги жазони ижро этиш муассасасида сақланган.

Комик ижтимоий тармоқда қамоқхонада ўтказган 88 куни ҳақида ҳам ҳазиломуз пост қолдирган. У 28 сентябрь куни Истанбулдаги Чағлаян адлия саройида суди бўлишини маълум қилган.

Муаллиф: Ҳасанбой ОЧУН